Zothlifim Logo
Loading ...
Mizoram NewsMizoram News

Mizo Hmeichhe Insuihkhawm Pawl (MHIP) chuan nimin khan an pawl hruaitu thar Aizawl Vanapa Hall-ah boruak ṭha tak hnuaiah an thlang a, kum 2013-2015 inkar atana hruaitu thlan thar te chu President ah, MHIP Gen Hqrs. President lo ni tawh, Pi Lalthlamuani, Dawrpui Vengthar thlan a ni.

Inthlannaah hian President thlanna neih hmasak ber a ni a, Vote 1286 tlaah vote 766 hmuin Pi Lalthlamuani thlan tlin a ni a, Pi Lalthlamuani hi Official Nomination-ah a tel lo a, Floor aṭanga vawrhchhuah a ni.

Vice President ah Dr Thanpuii, General Secretary-ah Pi Saipuii, Asst Secretary-ah Pi F Lalramliani, Treasurer-ah Pi Vanlalhriati leh Fin. Secretary-ah Pi Lalengkimi te thlan tlin an ni a. General Secretary Pi Saipuii leh Asst. Secretary Pi F Lalramliani te pawh hi Floor aṭanga vawrhchhuah tho an ni.

Inthlanna hi Central YMA Office Bearer leh CEC member ten an neihpui a, Police venhimna pawh pek an ni bawk a ni.

Zawhna chhangin, MHIP President thar Pi Lal Thlamuani chuan, MHIP Gen Hqrs-in Assembly a koh hnuhnun bera tihtura hmachhawp te bawhzui a nih tur thu a sawi a, MHIP chhunga buaina hrang hrang awm chungchanga zawhna erawh a chhang lo a ni.

Pi Lalthlamuani chuan, hmeichhia te ti hmasawn tura theihtawp chhuah ṭul a tih thu a sawi a, a sawrkar ang zawng leh a pawl anga hmeichhiate humhalhna piah lamah, a mimal anga kawng engkima ṭhanna a awm theih nan hmalak a ṭul a ni a ti a, rorelnaa hmeichhiate tana seat hauh sak chungchang chu thuneitu te thu a ni tih sawiin hetihlai hian seat hauhsak tlak hmeichhia inchher chhuah a ṭul a, reservation a awm avanga hmeichhia ten mawhphurhna an lak ngawt erawh a ṭha a tih loh thu a sawi a. Tunhma pawhin hmeichhe ṭha te chu an vawrh chhuah an lo ni tawh a, hetiang hian vawrh chhuah tlak hmeichhia an awm a ṭul a ni a ti.