Niminpiaha Kalna avanga boralta East Tuipui bialtu MLA, Pu Pu B.Lalthlengliana (66) chu nimin chhun dar 12 khan a chenna in Aizawl Bethlehem Veng-ah sawrkar leh Kohhran dan in vui liam a nih hnu ah Bethlehem veng thlanmualah phum a ni.
Pu Pu B.Lalthlengliana vuina hunah hian Congress party President leh Chief Minister ni bawk Pu Lal Thanhawla, MNF Party President Pu Zoramthanga, ZNP President Pu Lalduhoma MPC Treasurer Lalthansanga, Opposition Legislature Group leader Dr. R.Lalthangliana ten amah uina thu an sawi bakah Mizoram Legislative Assambly Secretary Pu Ngurthanzuala chuan sawrkar sunna hun hmangin a chanchin tawi leh thlahna a chhiarchhuak a, sawrkar aiawha vuina hun hi Speaker Pu R.Romawia’n a kaihruai a ni.
Assembly house Leader Chief Minister Pu Lal Thanhawla chuan House tizahawmtu Mizoramin a chân a ni a ti a, a MLA puiten ram leh hnam tana thawktu an chân chu a vanduaithlak a, a sulhnu chu Zofate’n an hre reng ang a ti.
Assembly Speaker Pu R Romawia kaihhruaiah hian MNF President Pu Zoramthanga chuan an party chuan an chân ropui hle tih sawiin, Block tin leh hmun tin aṭangin uina thu dawn a ni a ti a, chu ram hruaitu a nih kawngah hmui chauha rawngbawltu a ni lo tih a nunah a tilang hle a ni a ti a, mi chhawr nahawm theihpatawp chhuah mi leh ram rawngbawl kawngah mi entawn tlak tak a ni a ti.
MNF MLA Dr.R.Lalthangliana pawhin thusawiin, Pu Lalthlengliana chu mawhphurhna a lâk tawhna reng rengah thawhpui a nuam a, ngaihdan danglam tak nei, tum ren rawn neia tlang taka sawi chi a ni a, mi tuarchhel tak a ni a ti bawk.
ZNP President Pu Lalduhoma chuan Pu B.Lalthlengliana chu mithiam a ni a, sawrkar hna aia chuan mipui rawngbawl thlang zawktu mi ropui a ni tih sawin, MPC MLA Pu Lalthansanga pawhin an MLA pui Pu Lalthlengliana chu mi rilru zau, ram thatna tur vei mi a ni a ti bawk.
Pu B.Lalthlengliana pual hian Khawbung VC te huaihawtin nimin chhûn dar 11am aṭanga chawhnu dar 1 inkar khân Khawbung Centenary Auditorium-ah an Bialtu MLA Sûnna hun hi hman a ni a, party hrang hrang hruaitu leh khawtlâng nu leh pa amah ui-tute’n he sûnna hun hi an hmang a, Khawbung VCP Pu B.Van-lallawma’n a kaihruai a, VC Member Pu F.Malsawm-thanga’n Pu B.Lalthleng-liana chanchin a chhiar chhuak a. An Bialtu MLA sûnna hunah hian Pu B.Lal-thlengliana chu Khawbung khawtlâng tân mai ni lovin, Bial tâna an lunghlu, an thlamuanpui êm êm a nih thu an târlang a. Mi dik, a nihna ang taka thu sawi chhuak leh pehhêl kual ngai lo a nih thu te, ama MLA fund hmanga khawtlang leh Bial hma-sawnna atâna thil tangkai tak tak a thawh tawh thute sawi a ni.
Pu B.Lalthlengliana vuina hun ah hian Mizoram Larsap Purusothaman chuan a mah thlah nan a ruang chungah Pangpar a dah a, vuina Inkhawm ah hian sawrkar mipawimawh leh Politician te bakah NGO hrang hrang hruaitute an tel tha hle bawk a ni.