Law & Judicial Miniser Pu Lalsawtan, Mizoram sawrkarin High Court nei tura Sawrkar laipuia a thlen chu ngaihtuah mek a ni a ti.
Nimin session-a Pu K.Liantlinga zawhna chhangin Law Minister chuan, MNF leh India sawrkar inremna Memoruandum of Settlement-ah High Court nei turin ziah lan a ni tih sawiin, ziahlan ni lo mah se state tintenn High Court neih theihna chanvo a nei hrim hrim a, Mizoramin a la neih ve lohna chhan chu a hmun thuah central a la lungawiloh vang a ni a ti.
Hemi chungchang hi Chief Minister pawhin sawiin, tun dinhmunah hian high court siamna tur DPR cheng vbch 9 man chu sawrkar laipui hnenah thehluh a ni tawh a ni a ti. Chief Minister chuan tuna High court awmna hmun hi a rem loh avangin New Secretariat complex ah sawn anih theih nan a hmunhma te cheithat a nih thu a sawi bawk.
Mizo zingah High Court judge pakhat chiah an la awm thu sawiin Law Minister Pu Sawta chuan tunah hian Senior Advocate 3 te chu Judge tur hian recommend an nih thu a sawi a, a Senior ber a tel duh loh avangin Senior Advocate 2 te hming hi High Court Judge thlangtu colliegium hnenah thawn thlak a ni tawh tih House a hrilh bawk.
House Leader Chief Minister Pu Lal Thanhawla chuan High court nei tur hian Sawrkar chuan ruahmanna chak takin a kalpui tih House a hrilh bawk.
Hei bakah hian nimin Session-ah hian Sawrkar laipui Look East Policy tih hlawhtlin nan, Saiha District-a Laki khua a\anga Burma ramchhung Paletwa thleng motor kawngpui laih tel ve remtih a ni.
MNF member Pu C Ramhluna Private Members Resolution putluh Look East Policy tih hlawhtlin nana Sittwe leh Mizoram inkara lawng kawng leh motor kawngpui sial mek a hlawhtlin lehzual nan Laki a\anga Paletwa thleng hi motor kawngpui laih tel ve ni rawh se tih chu House-ah member ten an sawiho hnuah lungrual taka pawm a ni.
Nimin session-ah vek hian Pu Lalrobiaka resolution Mizoram-ah Territorial Army (Home & Hearth) din ni rawh se tih pawh House-in lungrual takin a pawm bawk a ni.