Mizoram News

Mizoramah kângmei tichhuak nasa ber

Forest Survey of India report tarlan danin India ram state zingah
Mizoram chu kangmei tichhuak nasa ber a ni a, kum 2010-2011 chhung
khan kangmei chhuak ṭum 1691 a awm a, 2011-2012 report tihchhuah la ni
chiahlo mahse a hma kum te ngaihtuah chuan kangmei chhuak zat hi a
tlahniam zawk nia hriat a ni.

Environment & Forests deptt. thawktute hnen atanga thu a dawn danin, a
kum telin kangmei chhuak zat hi a tlahniam zel a, hei hi a chhan ber
chu mipuiten ramngaw hlutna leh humhalh a tulzia an hriat tak vang te,
loneituten mei kawng an sial that tak vang te leh VC ten tha taka an
ram an vil vang niin an sawi. Kangmei chhuah chhan tam ber chu lo hal
vang a ni tih sawiin hei pawh hi NLUP hnuaiah huan/lo ram nghet kan
neih tak vangin ramkang hi a tlem sawt hle a ni an ti a. Kumin thal ah
pawh kumdang ngaihtuah chuan ramkang hi a tlem hle a, April thla tira
hmun thenkhat kang vangin tlemin kan sang leh ta deuh a ni, an ti
bawk.

DFO hrang hrang te report theh-khawm atanga a lan danin kum 2008-2009
khan ramngaw kang tum 71 awmin hectare 1453.2 a zau a kang a,
kangmeiin a tihchhiat hlutzawng hi `10,200.00 nia chhuta a ni a.
2009-10 ah ramngaw kang tum 1277 awmin hectare 30184 a zau kangin
ramkang tihchhiat hi `22,99,900.00 niin an chhut a, 2010-11 ah tum 69
ramngaw kangin hectare 1431.5 a zau a kang chhia a, `5,02,500.00 a hlu
a kangral a, nikum 2011-12 khan ramngaw kang tum 101 awmin hectare
1849.5 a zau a kang chhia a, kangmei tihchhiat hlutzawng hi
`2,67,275.00 nia chhut a ni bawk. Heng ramngaw kang hi lo hal vang leh
thildang vang nia tarlan a ni bawk.

Forest department thawktute chuan ram tikâng leh hâl ṭhinte hremna dan
an nei ṭha tâwk lo tih sawiin ‘The Mizoram Forests Act, 1955’ ah chuan
ram hal leh tikang chu thla 6 thleng lungin tan leh `500/- chawitira
hrem theih a ni a. ‘The Mizoram (Prevention & Control of Fire in the
Village Ram) Rules, 2001’ ah chuan V/C ten ram a kan loh nana hma an
lak dan tur leh hremna an lekkawh theih dan tur tarlan a ni.

‘Ram tikang tute Court hmaa kan hruaiin hremna na ber pe thin se kan
duh laiin Magistrate ten kan duh angin an hremloh chang a awm fo thin
a.Heng dan leh hremna te hian duhthu a sam tawklo hle a, chuvangin dan
thar khauh zawk kan mamawh tawh a, dan thar duan kan rilruk mek a ni,’
an ti bawk.