Nimin zing dar 6 rik hma hret khan, Silchar lam aṭanga Aizawl pan Motor lian pakhat chesualin Bualpui-ah Assam type in 2 a suin a delh a, he chet-sualna thlengah hian hmei-chhe naupang kum 9 mi a thi.
In 2 hi Pu Lalnunhlima leh Pu Lalruatfela te chhungkaw luahlai a ni a, naupang thi hi Laldawngzeli a ni a, amah enkawltu an chhungkhat hnai pakhatin nen riak dunin, a mutpui nu erawh in hliam na vak lo a tuar a, Kolasib Hospital panpui nghal a ni a; ngaihtuahawm a ni lo ni a thudawn a ni. Pu Lalnunhlima luah laiah hian a nupui leh a fate 4 an awm a, midang hi an him vek a, Choka lam chin a tlu tel lo a; a dang chu Motor hian a delh chhe hneh hle a ni.
In pakhat zawk Pu Lalruatfela te luah ah chuan a nupui leh a fate 2 an awm a. Amah hi driver anih avangin Motor khalha a chhuah bo lai a ni, tumah an hliam lo a ni.
He lirthei chetsual dan tak hi sawi thei an awm lo a, kawngchho chhuah chhoh hnu, kawng ngil zau lai tak a chesual a nih avangin motor khalhtu hi a muthlu ni a rin a ni a, driver hi Monjun Hussein Majumder Silchar mi a ni a, chetsualna thlen hnu hian chin hriat lohvin a tlanbo nghal a, Handyman Abdul Hussein erawh chu Kawnpui Police Station ah hren mek a ni.
He thil thlenna hmun hi Kawnpui SDO Civil Pu Lian-sangzuala Chhakchhuak pawhin a hmunah a tlawh a; Chhiat tawk chhungkua te hnenah Silpauline 1 ve ve leh Buhfai quintal khat ve ve a pe nghal a ni.