Nikum 2012 July ni 8 zinga Dinthar Aizawla hmeichhe naupang kum nga mi khuaikhem tuma puh Lalhmingsanga (25) S/o.Thanghuama, Sairang Saron veng chu nimin khan Court-in IPC section 376(2)(f)/511 angin thiamloh chantirin kum 10 tang tur cheng cheng singkhat chawi turin hremna a pe.
Lalhmingsanga hian hmeichhe naupang hi acid a leitir a, mi garage-ah kalpuiin a serh a fawhtir a, naupang thawmhnaw hi hlipin sex hmanpui a tum a, chutihlai tak chu garage neitu chuan a hmu a, a man a, JAC hnenah hlanin police ten an la a, mipui thinrimin kut an thlak nual hman a ni.
Hetiang thilah hian kum 2002 leh 2004 khan Lalhmingsanga hi court-in alo convict tawh a. Hmeichhe naupang bawk kum 2008 kumah Dinthar naupang a tih ang chiah hian alo ti tawh a, hei vang hian Dt. 5.7.2010 khan Lucy Lalrinthari, Addl. District & Session Judge, Aizawl chuan kum 4 tang tur leh Rs. 1000/- chawi turin a lo convict tawh bawk a ni.
KL Liana, Addl. District & Session Judge-I, Aizawl chuan, tunhmain vawi thum hetiang thil avang hian thiamloh chantir a ni tawh a. Lucy Lalrinthari’n kum 4 tang tura a tih leh Rs. 1000/- chawi tira, a chawi theih loha thla khat dang tang tura a tih hi a nihna angin tang nise, kum 2013 January thlaah a chhuak chauh dawn tihna a ni a, mahse sorkarin dan angin a tan hun tur hi remission a pek avangin 7.3.2012 khan Jail atangin a chhuak a, hetianga a chhuah hun tur court-in a tih aia hmaa a chhuah tak avangin he hmeichhe naupang chungah hian he thil zahthlak tak hi a tih theih phah ta a, a tan hun hi pawh tawi sak lo sela chuan hmeichhe naupang hian hetiang thil hi a tawk lo tur, tiin judgement-ah chuan a tarlang nghe nghe a ni. Judge chuan, tunhmain vawi thum convict a ni tawh a., chuvangin a chungah zahngaihna lantir theih ani tawh lo e tiin Lalhmingsanga hi hreawm taka kum 10 tang tur leh Rs. 10000/- chawi turin hrem a ni, pawisa hi a chawi theihloh chuan kum khat dang a tang leh ang. Nimin khan Central Jail lama thawn liam nghal a ni.