NLUP Phase-II-na hnuaia thlai ṭiak, sangha chi leh ran vulh tur pek chhuah dan tur chungchang ngaihtuahin NLUP Input Purchase Board chu nimin khan an Chairman, Chief Secy Pi L.Tochhong hovin nimin khan Chief Secretary conference room-ah an thu khawm.
Nimina meeting ah hian NLUP Phase I-a department 4- Horticulture, AH & Vety, Soil & Water Conservation leh Fishery dept hnuaia ṭanpuina dawng ten anmahni remchan dan anga thlai tiak leh ran vulh tur an lak khawm dan leh he kalphung fel tawk lohna lai te sawiho a ni a. Phase II hnuaiah kalphung mumal zawk a awm theih nan tender hmanga thlai tiak supply tawh turin ruahman ni se an ti a, Vawk note tam zawk thar turin Aizawla piglet multiplication centre te chu tihlen tura tih a ni a, hei bakah hian Fishery department nursery te pawh thawktu tam zawk nena thuam turin hma lak tum a ni bawk.
Pi L.Tochhong chuan NLUP hmalakna a thuanawp loh nan Input Purchase Board chuan kalphung thar a neih a tul tih sawiin a kaihhnawih department te chu nasa lehzuala tan la turin a chah a. NLUP in miretheite tana eizawnna a buatsaih sak chu a ngelnghet tur a ni tih sawiin phase I hnuaia tanpuina dawng ten an hmalakna an chhunzawm tha em tih enfiah a, department hmalakna dinhmun te enchiang tur leh thla 1 chhunga evaluation report siam peih turin department 4 te chu a hriattir bawk a ni.