Vawk pul hri hlauhawm zawk, tuna Myanmar rama leng mek ‘Porcine Reproductive and Respiratory Syndrome’ Mizorama a lo luh ve loh nan District hrang hrang Bawrhsap-te chuan ram dang leh state pawn aṭanga vawk lak luh an khap.
AH & Vety Department thurawn pek anga vawk lakluh khapna thupek District Magistrate te leh Sub-Divisional Magistrate ten an chuah hi Cr.PC Section 144 tlawh chhana thla hnih chhung hman tura chhuah a ni a, District hrang hrang Magistrate te chuan vawk hri leng vanga vawk damlo leh thi sa zawrh leh ei an khap a, vawk thi reng reng chu tha taka phum vek turin a neitute a hrilh a, ran talh tur reng rengin anmahni bialtu, Veterinary Officer hriattir hmasa a, talh tlak a nih leh nih loh enfiah hmasak tir vek turin vawk neitute an hrilha, vawk hrisel, ei tlak talh a nih chuan a talhtute certificate pe turin an hrilh bawk a ni.
He tih lai hian Aizawl District leh District dang thenkhata leng mek, vawk natna hri, ‘classical swine fever’ chuan ziaawm lam a pan tawh niin AH & Vety Dept. hotute chuan an sawia, Aizawlah chuan vawk damlo tam tak an ṭha chhuak leh tawha, tam takin that lam an pan bawk niin an sawia, hengte hi a tul dan angin enkawl zui zel an ni. He tih lai hian he natna hri hian vawk hrisel tha dangte a man zui zel loh nan Vawk te chu hri venna Vaccine pek zui zel a ni bawk a ni.
Hetihlai hian Lunglei district-ah chuan vawk hri ‘classical swine fever’ avangin vawk 100 chuang an thi tawh nia thudawn a ni a. Vety department hnathawkte’n theihtawp an chhuah avangin a ziaawm chho tawha, he tiang bawk hian Saiha, Lawngtlai leh Champhai District-ah te pawh a zia awm chho tawh nia thu dawn a ni.
He tih lai hian Aizawl khawpui leh District khawpui dang, vawk hri lennaah te chuan Inrinni zing barzarah khan vawk sa lei an tlem a, bawng, ar leh Sangha lei an tama, Aizawlah chuan arsa man Kg khat `220 atangin `240-ah a kai nia thudawn a ni.