Pu Lalsangliana, MCS, Additional District Magistrate, Serchhip District chuan April ni 25, 2013 khan thupek chhuahin, Ran talh tur reng rengin Veterinary Officer hnen aṭangin ran hrisel leh ei tlak ngei a ni tih lantirna Certificate an nei ngei ngei tur a ni, a ti.
Tunlaia Aizawl leh a chhehvela Vawk natna ‘Classical Swine Fever’ leng avangin mi tam takin an vawk vulh te chânin, tam tak hlauthawng takin an awm mek a, chubakah Myanmar-a vawk natna leng fo ṭhin ‘Procine Reproductive and Respiratory Syndrome (PRRS) hi Mizoramah alo thleng ang tih a hlauhawm hle tih thupekah chuan tarlangin, hei vang hian Myanmar aṭanga vawk lakluh leh natna avanga vawk damlo leh thi ei a khap a, natna avanga vawk thi reng reng uluk tak leh thuk taka phum tur a ni tih thupekah chuan a tarlang bawk a, he thupek hi thla 2 chhung huam tur a ni a, thupek zawmlo te chu Sec. 188 IPC hmanga hrem theih an ni dawn a ni.