Ran talhna hmun hawng

Cheng vaibelchhe 4 leh nuai 12 senga sak, Darkar khat chhunga a ruala ran 8 talh theihna Aizawl Mualpui-a AH & Vety ran talhna hmun, Rural Slaughter House, Mualpui a mi chu nimin khan Chief Minister Pu Lal Thanhawla’n a hawng.

Hawnna inkhawm AH&Vety. Secretary Pu T. Sangkunga kaihhruaiah Chief Minister Pu Lal Thanhawla chuan ram changkang tehna pawimawh tak pakhat chu hriselna a ni a, chuvangin sawrkar laipui pawhin rampumah mipuiten hriselna tha zawk an neih theihnan nasa takin hma a la mek a ni, a ti. Mizote pawhin hriselna lam kan ngai pawimawh tulh tulh a, ei leh in chungchangah pawh kan firin kan fimkhur zawk tawh a; sa thianghlim zawk mipuite lei thei tura sawngbawl theihna tur Slaughter House changtlung tak Mizoramah a awm ve thei ta chu a lawmawm a tih thu Chief Minister hian a sawi a. Hmasawnna tur tam tak kan la ngah hle naa hetiang thil te thama kan ngaihah pawh hma kan sawn zel hian Mizote chu changkan lam pan duh hnam kan nih zia a tilang a ni, a ti. Aizawl hmun dang te bakah District Headquarter tinah ran talhna in sak tum a nih thu sawiin Chief Minister chuan hetianga thianghlim taka sa eitur sawngbawl hian mihringten ran atanga hri an kai theih tur lakah thui takin min veng thei a ni, a ti. NLUP hnuaia bawng vulh thlangtu thahnem tak an awm avangin vawiinah hian Mizorama bawnghnute dehchhuah chu 43%-45% in a pung a; bawnghnute sawngbawlna tur Treatment Plant pawh Chhingchhip-ah nuai 35 senga sak tum a nih thu Pu Lal Thanhawla chuan a sawi bawk.

Khualzahawm AH&Vety Minister Pu N.K.Chakma pawhin thu sawiin Mizoram chhungah thianghlim leh uluk taka sa talhna tur Slaughter House hawn a ni thei ta chu Department leh satalha eizawngte tan ni chhinchhiah tlak a ni, a ti. Tun Budget Session zawhfel takah Mizoram Slaughter House Bill pass theih a ni ta chu lawmawm a tih thu sawiin Pu N.K.Chakma chuan mipuiten sa thianghlim an lei thei nan sorkar chuan ruahmanna siam zel a tum a ni, a ti. Slaughter House sakna tur hmun Salem Veng Local Council ten phal taka sorkar an pek chungah lawmthu a sawi bawk a ni.

AH&Vety. Director Dr. LB Sailo chuan Report kimchang tak pein Rural Slaughter House, Mualpui chu NABARD tanpuina Cheng nuai 412 hmangin ni 29.8.2011 atanga sak tan niin ni 19.3.2013-ah commisioned fel a ni, a ti. He Slaughter House danglam bikna chu khawl hmang leh Mizo ten kut hmanga satalh kan tih dan ṭhin ang tho a tih theih ve ve turin he hmun hi ruahman a ni a. A rualin ran 8 darkar khata chhungin talh leh sawngbawl thei tura khawl te hi duan a ni a, tuna training nei mek satalhtuten an thiam nal hunah phei chuan darkar khat-ah 10 chuang talh thei tura beisei a ni.Na hre lo leh hrehawm tuar reilo thei ang ber turin ran te hi talh thin a ni.

He Rural Slaughter House, Mualpui ah hian ran talh atanga bawlhhlawh leh ningnawi chhuak nitin 1000 kg. sawngbawlna hmun ‘Effluent Treatment Plant’ a awm a; Sa kawchhung felfai leh thianghlim zawka sawng-bawlna hmun ‘Trippery’ pawh awm bawk a ni. Ran talh tur lo thlunkhawm lailawkna hmun ‘Cattle Reception’ te, ran talh an nih hma darkar 24 tan an chawlh hahdam lailawkna hmun ‘Lairage’ pawh sak nghal a ni. Lairage chhungah hian ran talh hmain an hriselna enfel hmasak vek an ni thin a, ran talh a nih hnuah exam leh a ni a, a tha lo lai a awm chuan hralh chhuah loh tura tihral a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram