Retheihna nuaibo hna beihpui thlakna tur hawng

Mizoram News

Chief Minister Pu Lal Thanhawla chuan nimin khan a office conference roomah retheihna nuaibo hna beihpui thlakna tur, National Rural Livelihood Mission (NRLM) zulzuia din, Mizoram State Rural livelihood Mission a hawng.

Chief Minister chuan Central sawrkara Ministry of Rural Development kaihhruainaa National Rural Livaelihood Mission Mizoramah hawn theih a ni chu a lawmawm hle a ni, a ti a. Retheihna nuaibo tura merethei leh harsa te khaichhuahna tura sorkarin hmalakna engemawzah alo neih tawh, Integrated Rural Development Programme (IRDP) te, Training of Rural Youth for Self Employment (TRYSEM) te, Development of Women and Children in Rural Areas (DWCRA) te leh a dangte kalpui thin anih thu a sawi a. Kum 2011 June thlaah NRLM in a din a ni, a ti a. India mipui tam zawk hi thingtlanga khawsa, mirethei leh harsa tak takte an nih avangin central sorkar hian an hmasawnna hi angaipawimawh em em a ni, a ti a. Heta pawimawh tak chu an dawn tur te hi an hnen a thleng ngei em tih hi a ni tiin, a hna thawktu sorkar hnathawkte hi an pawimawh hle dawn a ni a ti a. Chuvangin a thawktute chu ngun taka inbihchiang thin turin a chah a ni.

Hawnna inkhawma khualzahawm Pu R.Lalzirliana, Rural Development Minister pawhin thusawiin, NRLM hi Mizoramah chuan thil thar anih thu a sawi a. Mirethei leh harsa te khaichhuahna turin kum 1999 khan SGSY kalpui thin anih thu leh that tawk lohna tam tak a awm avanga NRLM in a rawn thlak a ni a ti a. Mizoramah nikum 2012 a kalpui tan anih thu sawi bawkin mahnia inrelbawl tur, autonomous body anih thu a sawi bawk a ni. Pu Zira chuan mirethei lam tang sorkar hian theihtawp a chhuah zel dawn a ni, a ti.

Central sorkar aiawhin Pi Smita Jacobs, Consultant, Ministry of Rural Development in powerpoint hmangin NRLM lo pian dan leh a thil tumte bakah a kalphung tur leh kalpui chhoh dan turte chipchiar takin a sawifiah bawk a ni.

NRLM in retheihna nuaibo a tumna kawngah hian thingtlang miretheite a tinzawn ber a. Heta tan hian khawtlang chu awmze neia Self Help Group (SHGs) ah te siamin thiamna bik nei ten an kaihruai ang a, sum lam tanpuina an dawn theihna turin bank lam te pawh inhawng tura beisei an ni a, skill development kalpui uara hna hmuh sak te leh Rural Self Employment Institution te dina kalpui tura ruahman a ni. NRLM hi SGSY siam thatna a ni deuh ber a ni.

National Rural Livelihood Mission hi North East State te zingah chuan Mizoram chu a kalpui hmasa ber tu a ni a. A kalpui tu tur Team pawh thlan fel vek tawh an ni a, Block levela kalpuitu tur pawh thlan mek an ni.Annual Action Plan for 2012 – 2014 pawh December thla 2012 khan pawm alo ni tawh bawk a ni.

Hawnna inkhawm hi Pu Lalrinmawia Ralte, Parliamentary Secretary for Rural Development Department etc. in a kaihruai a, Minister Pu Lalsawta leh Pu H.Rohluna te an tel bawk a ni.

Leave a Reply

This site uses Akismet to reduce spam. Learn how your comment data is processed.