North Korea-in missile kahchhuah chhin a tum ni a a lan avangin, South Korea chu a inralring nghal hle a, North Korea thurualpui China-in indo hmachhawn mai thei tur khawpa boruak a ṭan laia, boruak ti sosang zawnga che lo tura North Korea a hrilh hnuah pawh North korea hian a ram chhak lam tuipui kamah km 3000 a thui kap thei, an ramchhung kutchhuak, Musudan missile pahnih a chhawpchhuak niin South Korea Intelligence Official ten an sawi a ni.
Kar kalta khan, North Korea khawpui Pyongyang-a awm forigner te chu an ram chhuahsan tura in buatsaih turin North Korea sorkar chuan a lo hrilh tawh a, hei hi vawiin ni 10 leh ni 15 inkara missile kahchhuah a tum vanga sawi a nih rin a ni a, North Korea hian nuclear hmanga inbeihna a thlen theih thu a lo sawi tawh a ni.
Hetihlai hian, South Korea leh US Sipai te chuan North Korea nena an inkar boruak an tehna “Watchcon” level chu 3 atanga 2 –ah a dah a, boruak muanawm ah Watchcon 4 dah a ni a, an dinhmun a derthawng ni a an hriat chuan 3 ah dah thla in, indona a thlen tak tak chuan Watchcon 1 ah dah a ni a, hei vang hian Watchcon 3 atanga 2-a dah hian North Korea nena indona chu a thleng thei tak tak a ni tih a lantir a ni.