Nimin khan Serchhip Hmar veng YMA hall-ah Soil & Water Conservation
Department chuan an department hnuaia trade 3 Hmunphiah, Rubber leh
Coffee chin thlangtute tan NLUP tanpuina thawhhnihna an sem a,
Serchhip District NLUP Nodal Officer Pu Robert C. Lalhmangaiha chuan
khuallian niin a hmanpui a ni.
Khuallian chuan thu sawiin Serchhip District chhunga NLUP Line
department ten NLUP hlawhtlinna tura theihtawp an chhuah tlang chu
lawmawm a tih thu a sawi a, Soil & Water Conservation Department
hnuaia Baktawng Tlangnuam khua a Hmunphiah chingtute hmalakna avangin
NLUP 1st Phase-ah pawh Baktawng Tlangnuam khua hian 'Best Village'
lawmman an dawng tawh a ni a ti. Pu Robert-a chuan Mizoramin tlangram
lo neih kan kalpui chu mithiam ten a that lohzia leh a hlawkloh zia
hriain eizawnna kumhlun leh tha zawk neihna tura hma an lakna chu NLUP
thiltum pawimawh tak a nih thu a sawi bawk.
Khuallian chuan Line Department hrang hrang hnuaia NLUP tanpuina
dawngtute chu mahni Trade thlan theuhah hlawhtlinpui tura tan la tura
chahin, Line Department danga mite nen pawh inelna thianghlim nei a, a
ti hlawhtling tha ber nih tum theuh turin a chah bawk a ni.
Nimina Soil & Water Conservation Department in NLUP tanpuina an
pekchhuahah hian Serchhip Cluster huam chhunga Hmunphiah ching tur
chhungkaw 37 hnenah ` 19,600/- theuh leh rubber ching tur chhungkaw 40
hnenah ` 6900/- theuh hmanraw leina leh terrace laihna tur an pe a,
hemi hmalam hian heng mite hnenah hian Lo vahna tur ` 5000/- theuh
pekchhuah a lo ni tawh bawk. Tin, vawiin a tanpuina semchhuah rual
hian NLUP 1st Phase-a Coffee chin thlangtute hnenah an tanpuina dawn
tur hnuhnung ber chu pekchhuah nghal a ni.
NLUP tanpuina sem inkhawm hi Pi Rosy Lalmuansangi Hmar, ASCO in a
kaihruai a, Pu HL. Chungnunga, DCSO Serchhip in tanpuina dawngtute
hnenah an thlai chindan turte leh a enkawl danturte hrilhin zirtirna a
pe nghal bawk a ni.
S&WC Department hian tunkar chhov hian Serchhip District chhunga khaw
hrang hrang, Thenzawl, Chhingchhip, Khawlailung leh Tlungvelah te NLUP
tanpuina hi an lo sem tawh a ni
