Mizoram News

Youth Festival hawng

Sports and Youth Services Department-in thalai te pual Youth Festival vawi 1-na Aizawl Beraw Tlanga Multipurpose Cultural Complex-ah a buatsaih a, ni 4 awh tur he prog hi nimin khan Health Minister Pu Lalrinliana Sailo chuan a hawng.

Hawnna thusawiin Pu Lalrinliana Sailo chuan tunlai khawvel ṭhang chho mekin a ken tel – changkanna in Mizoram pawh chak takin a tuam mek a, heng changkanna thil hrang hrang te hi a bikin thalai ten an hman tangkai thiam a tul a ni a ti a, Mizoram chu Bangladesh leh Myanmar ram ten an karcheh avangin insumdawn tawnna lamah kawng zau tak a in hawn mek thu sawiin, hei hian thalai te tan hnathawh tur tam tak a siam sak thei a ni, a ti a ni.

Ṭhalai kalkawm te chu zuk leh hmuam lakah te, ruihtheih thil lakah te leh mipat hmeichhiatna lamah te fihlim a, taimakna, tuarchelna, dikna, thawhrimna leh ram hmangaihna te an nunah theuh seng lut turin a chah a. Youth Festival chu Mizoram mai ni lo Mizoram pawn thlenga tangkai taka an hman theih nan duhsakna a hlan bawk a ni.

Ni 4 awh tur, Festival ah hian District hrang hranga zirna in sawmbik atangin sikul naupang mipa 195 leh hmeichhia 133 an tel a. He festival-ah hian Mizo infiamna chi hrang hrang ah te inelna siam a ni dawn a. Adventure activities te, Intellectual leh Arts programme te, lemziah leh thalak lamah intihsiaknate leh AIDS/HIV awareness programme te neih a ni dawn a ni.