State Disaster Management Authority huaihawtin New Civil Secretariat Complex, Khatla-ah chhiatna liantham thlenga insingsak dan enchhin a ni a, he mock-drill hi a tak ang thei ber tura ruahman a ni a, hnathawktute pawh hriattir lawk an ni lo va; chhanchhuah hna thawktu turte pawh ral aṭanga koh chawpa lo kal tura ruahman a ni.
Chawhnu Dar 2-ah ralkhel dar nasa taka tihrik a ni a, hnathawktute chu Police-ten awmze nei takin an tlanchhuahtir a. Hemi hnu hian Fire & Emergency Service lamte lo thlengin, chhan-chhuah ngaite an buaipui a, kangmei chhuakte tuiin an phuh hlum a. Sports & Youth Services leh Central YMA hnuaia Adventure Team leh Rescue Team te an thleng zui a, anni bakah hian 3rd Bn MAP aṭangin rang takin State Disaster Response Force te, Medical Team te, Power & Electricity Dept. te, I&PR Team te, PHE Dept te, MPRO te, DM&R Team te, Police te an rawn thleng zui nghal bawk a ni.
Nimina mock-drill-ah hian awmze neia tlanchhuah dan te, hliam bawihsawm leh senghawi dan chi hrang hrangte a taka entir a ni.
Mock-Drill zawh hnua inkhawm buatsaihah Disaster Management & Rehabilitation (DM&R) Minister Pu Nihar Kanti Chakma chuan thu sawiin “Mizoramah chhiatna a thleng zauh zauh a; Civil Secretariat phei chu sawrkar hotu lute leh mi pawimawh tam zawkte hnathawhna hmun a nih avangin chhiatna lian a lo thlen pawha tluang taka sawrkar inrelbawlna a kal theihnan insaseng dan leh mahni inbuaipui dan thiam a tul a ni” a ti.
Chief Secretary a nihna bakah, Chairman, State Executive Committee leh Chief Executive Officer, State Disaster Management Authority mawhphurhna chelhtu Pi L.Tochhawng pawhin thu sawiin, “Mizoram leilung a ngheh loh avangin chhiatna lian tham lo thleng thei laka inralrin a pawimawh a; lo inralrinna chuan chhiatna avanga tawrh theihna tur chanve lakah a tifihlim thei a ni’ a ti.