Aizawl New Market Main Building leh sa zawrhna building, Hunthar Veng, Sairang kawng chhaka Pi Khawtini building leh Aizawl Bungkawn Venga Lai House a him tawk lo.
Trade & Commerce Director, Pu C.Lalzirliana’n thla hlui ni 15-a hriattirna a chhuah danin, New Market main building leh sa zawrhna building hi a hlui tawh avangin chenna leh mihring luah atan a him tawk tawh lo tih mi thiamte’n an enfiahna atanga hriat a ni a, hei vang hian chhiat rupna thleng thei laka mipuite an him tlan theih nan heng building 2-a thil zuar zawng zawngte chu hriattirna chhuah atanga a rang lama inthiar fihlim turin a ti a ni.
Hunthar Veng, Sairang kawng chhaka Pi Khawtini building pawh Aizawl District Disaster Management Authority-in thiat turin a ti a, nimina hriattirna a pek atanga thla khat chhunga ṭhiat turin a ti a ni.
Aizawl Bungkawn Venga Lai House pawh a thlanga awmte’n a him tawk lo ni-a sawiin tunlai hian a thlanga awmte chu an riak chhuak thin niin an sawi a, Bungkawn Local Council leh a thlanga awmte sawi danin, Lai House thlang lungrem hi nikum khan a min a, tun thlenga rem that a la nih loh avangin tunlai hian a min leh an hlau hle a, a thlanga chhungkaw tam tak chu an riak rau thin niin an sawi.
Lai House LO, Pu Sangthang-puia chuan an building chu District Disaster Management Authority-in an enfiah tawh a, ti tura an tih te pawh an ti tawh a, a thlanga In hmun 2 pawh an lei sak tawh a, a building chu chei that turin ti mah se, District Council thuneitu lamin a thlanga an ram lei tharte nen a vaia sak ṭhat ni se an tih angin chumi hun chu nghah a ni tih a sawi.