Mizoram News

Aizawl khawpui-ah Sq.Km.2.05 lai hmun hlauhawm a awm

Mithiam ten an chhut danin Aizawl khawpui huam chhunga km 2.05 bial chu hmun hlauhawm ni-ah an ngai a, hei hi Aizawl khaw pumpui atanga chhutin za zela 1.32 a tling a ni.

Aizawl khawpui chhung-ah hian leimin hlauhawmna hmun a tam hle a, mithiamte’n a hlauhawm lo deuh mual nia an sawi hmunte pawh fimkhur ngaihna hmun tam tak a awm tho niin Geology and Mineral Resources department Joint Director Dr H. Lallenmawia chuan a sawi.

Dr Lallenmawia chuan a bik takin Armed Veng, Ram-thar Sihpui ruam, Ramhlun Sports Complex, Hunthar leh Saron Veng te chu hmun himlo zual ‘Very High Risk zone’ an ni a ti a. Aizawl khaw-pui-ah hian fault lines an tih mai hmun nghetlo kal kawng 14 a awm a, chumi kalkawnga awmte chu a tlangpuiin a him lova, leimin leh lei tawlh a awm duh bik niin a sawi.

Mizoram State Remote Sensing Application Centre (MIRSAC) leh Geology and Mineral Resources mithiamte chuan Aizawl khawpui hi zone hrang hrang Very High Risk Zone, High Risk Zone, Moderate Zone, Low Zone, Very Low or No Risk Zone leh Water Body-ah te an ṭhen a ni.

High Risk Zone hian Sq.km 32.21, Moderate Zone-in Sq.km. 68.59, Low Zone-in Sq.km. 43.18, Very Low or No Risk Zone-in Sq.km.9 leh Water Body ten Sq.km. 0.17 te an awh niin an sawi. Hmun him Very Low or No Risk Zone hi lei sakhat leh min mai mai lo tura ngaih deuh an ni a, heng zingah hian Luangmual, Mualpui, Khatla-a New Secretariat Complex leh Bawngkawn Brigade mual te chu dah a ni chungin khawi laiah emaw chuan miin lei a laiha min thei a awm thei tho niin an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram