Zothlifim Logo
Loading ...
Serchhip NewsSerchhip Chanchinthar

Pi Lalsiampuii, District Child Protection Officer (DCPO), Serchhip District chuan nimin khan a Office-ah Serchhip tualchhung thuthar lakhawmtute kawmin, an Department hnathawh dan a hrilhfiah.

Pi Lalsiampuii, DCPO chuan kum 2009 khan India ramin Integrated Child Protection Scheme (ICPS) hi a kalpui ṭan a, Mizoramah chuan kum 2011 khan kalpui ṭan a nih thu leh The Juvenile Justice (Care and Protection of Children) Act, 2000 chu an behchhan thu a sawi a, Social Welfare Department hnuaiah dah niin, kum 2012 January thlaah Mizoram District zawng zawngah kalpui a nih tawh thu a sawi bawk.

Pi Lalsiampuii chuan naupang (kum 18 hnuai lam) venhim leh an dikna humhalh bakah naupang te ṭhatna tur ngaihtuah chu an hnathawh ber a nih thu a sawi a, an hnuaiah hian Committee/Board hrang hrang an awm thu pawh a sawi a, naupang mamawh tur leh himna tur leh naupang venhimna ngaihtuah turin Child Welfare Committee a awm tih a sawi a, tunah hian Serchhip-ah chuan he Committee Chairman chu Pu Lalzuiliana, Head Master, Govt. JM High School a ni.

Naupang-ten thilsual an tih a, an chunga rorel tur bik Juvenile Justice Board a awm thu pawh sawiin, hetah hian Principal Magistrate hovin thubuai an ngaihtuah ṭhin a, Principal Magistrate atan hian Civil Judge-cum-Judicial Magistrate an hmang ṭhin tih a sawi a, naupangten thilsual an lo tiha anmahni buaipui turin Police Station tinah Special Juvenile Poolice Unit din a nih tawh thu pawh a sawi a, hetianga naupang thilsual ti te an chungthu ngaihtuah chhunga lo dah lailawkna tur Observation Home chu Serchhip-ah a la awm loh thu leh an mamawh thu pawh a sawi a, tin, naupang thilsual tite hi Jail-ah dah theih an nih loh avangin Special Home-ah dah ṭhin an ni a, Special Home aṭanga chhuak, nu leh pa hnena haw-na tur nei silo te chu Shelter Home-ah dah ṭhin an ni tih pawh sawiin, Shelter Home hi Mamit leh Champhai-ah din a ni tawh tih a sawi bawk.

DCPO kaihhruaina hnuaiah Sponsorship and Foster Care Approval Committee an awm leh a, anni hian retheih vanga Home-a naupang awm ngai te Home-a an awmlohna tura ṭanpui dan ngaihtuah chu an hnathawh a nih thu a sawi a, tunah hian hemi atan hian sum an hmu tawh tih sawiin, naupang sponsor tur hi YMA Branch hrang hrang te kaltlangin an zawng mek tih a sawi a, tunah hian sponsor tura rawt engemawzat an awm tawh thu leh heng rawtna lut te hi endik an nih hnu-ah pek tlaka ngaih te an pek tur thu a sawi a, chhungkaw pakhatah naupang 2 aia tam lo an pek theih thu leh naupang pakhat chu thla khatah `1,000/- kum 3 chhung an pek ṭhin thu a sawi bawk.

Hei bakah hian District Bawrhsap kaihhruaina hnuaiah District Child Protection Comm-ittee leh CDPO Chairman-na hnuaiah District Level Inspection Committee te pawh din a nih thu a sawi a, naupang harsatna nei te tan Child Line siam niin, Idea tih loh network dang zawng zawng aṭangin 1098-ah a thlawnin biak theih a nih thu a sawi bawk.

Serchhip-a DCPO Office hawn a nih hnu-ah thubuai CWC hnuaiah 31 chinfel a nih tawh thu leh tunah hian 3 ngaihtuah tur an neih mek thu a sawi a, JJB-in thubuai 26 an chinfel tawh thu a sawi bawk.

Tun dinhmunah Serchhip-a DCPO Office-ah thawktu 14 an awm a ni.