Mizoram News

HPC-D leh sawrkar inbiak hun tur sawn hla

Tun thla hapta hnuhnung bera Mizoram sawrkar leh Hmar People’s Conference – Democrats (HPC-D) aiawhte inbiakna neih tura ruahman chu sawn hlat a ni.

Home department hotute sawi danin HPC (D) palaite chuan May thla chawhnu lama inbe tura ruahmanna chu HPC (D) lam inpeih hman loh avangin sawn hlat a ni a. HPC (D) hian an thil phut (Charter of Demands) an la peih hman loh avangin hun an dil belh a. An inpeih fel hunah inbiakna hi chhunzawm tum a ni. Home department hotute chuan inbiakna hi June thla chawhma lama chhunzawm theih an beisei a, mahse, HPC (D) lam inpeih hun leh an inpeih tih an rawn hriattir hunah rem chan tlan hun tur ngaihtuah a nih tur thu an sawi a. HPC (D) lamin politics level-a inbiak an rawtna pawh inbiak leh hunah sawiho leh phawt a nih rin a ni.

Mizoram sawrkar leh HPC (D) hian January ni 31 khan thla ruk chhung atan inkahhai (Suspension of Operations) an puang a. April ni 19 khan SP CID (SB) Pu Ramthlengliana hovin Joint Monitoring Group chu Sakawrdai-ah an ṭhukhawm a. Mizoram sawrkar leh HPC (D) aiawh 3 ve ve awmna Joint Monitoring Group chuan inkaihhai puan chu a tawn tawnin an zawm tha thawkhat nia an ngaih thu he inhmuhkhawmnaah hian an sawi a. HPC (D) aiawhte chuan tuna official level-a inbiakna kal mek chu political level-a hlankai an duh thu an sawi a, sorkar lam aiawhte’n he rawtna hi sorkar hnena lo thlen an tum thu an sawi a ni.

Hetihlai Mizoram leh Tripura ramri a boruak ṭha a la awm theih loh avang leh Tripura sawrkar lam a la inpeih chiah loh avangin hian kar leh chhunga Tuikuk raltlante laklet tan leh tura ruahman pawh a tlawlh rih dawn niin a lang a. Tripura sawrkarin raltlante endik tura Mizoram sawrkar nena hmalak dun dan turah an hman hun tur a rawn hriattir hnu-ah hemi chungchang hi bawhzui leh a nih chauh tur thu Home department hotute chuan an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram