Inrinni khan Thingsul-thliah aṭanga HSCL leh HSSLC pass ṭha zirlaite lawmpuina hun hman a ni a, Home Minister leh Bialtu MLA, Pu R.Lalzirliana chuan he hun hi a hmanpui.
Pu R.Lalzirliana chuan Thingsulthliah zirlaiten result tha tak an neihna chhan chu khawtlang hruaitute, nu leh pa, zirtirtu leh zirlai te tanrual vang a ni, tiin Bialtu MLA a nihna angin thinlung takin ka lawmpui a ni, a ti. Private school-a thawkten hlawh tlem zawk nei mahse theihtawp an chhuah thin avangin result tha tak tak an nei thin a, an inpekna a fakawm hle a ni, a ti bawk.
Thingsulthliah khaw chhuak zirlai tiṭha te zingah HSLC Result pumpuia 10-na Vanlalramthari Ralte leh HSSLC (Arts) pumpuia 3-na Malsawm-dawngzela leh 9-na PT Malsawm-kima te pawh an tel a ni. Hemi ni hian zirlai HSLC leh HSSLC pass mi 61 te hnenah Minister hian lawmpuina a hlan a, Thingsulthliah PTA hnenah lawmpuina `10,000/- a pe bawk a ni.