Mizoram Board of School Education a thawktute chuan kumdang aia kumin HSLC leh HSSLC result a chhiat chhan chu an hriat bik loh thu an sawi.
MBSE hotute chuan, “Kumin HSLC leh HSSLC zawhna te hi a tluangin sawisel a awm kan hre lo a, zirlaite pawhin a har an ti lemlo niin an sawi. Hetih laia pass an tlem hi enge a chhan dik tak hriat a har a, rin dan chi hrang hrang zingah chuan kum 2010 a Class VIII te Middle School ah a beh dawn khan a huho deuhin pass tir an ni a, khang mite kha kumin a HSLC exam te kha an ni a, hei vang hi a ni thei ang em ti an awm a. Hei bakah hian huau huau kan ngah lutuk te, media lama hmasawnna avanga facebook leh TV kan en nasa te, kan society free lutuk avang te ni theiah kan ngai a ni,” an ti bawk.
Board dang aia Mizoram Board-in mark an ren zawk nia sawi chu a diklo tih sawiin ‘result entute hnenah pawh ‘a thiam ah na na na chuan mark ren suh u’ kan ti a, duhsak taka en turin kan hrilh ngun a, mark an ren kan hre lo a, key answer a innghat lo tur leh a lam hawia an chhan phawt chuan mark pe zel turin kan hrilh a ni,’ an ti a. MBSE in syllabus a siam chu state dang leh board dangte aiin a hniam chuang biklo tih an sawi bawk.
Mi \henkhatin kumin atanga HSLC exam awm tawhlo tura an sawi chu sawifiahin ‘exam tir leh tirloh hi chu state sorkar thu thu a ni a, ministry thuneihna leh duhthlanna tur anih vangin an tih dan dan a ni mai a, tun thleng chuan exam neilo tura thutlukna an siam kan la hrelo a ni,’ an ti.
