Tun hnaia ruahsur leh thliin Mizoram district hrang hranga chenna in a tih chhiat chungchang sawiho turin nimin tlai khan Chief Minister Pu Lal Thanhawla chuan Chief Secretary charge la mek tu Ashwini Kumar, Disaster Management & Rehabilitation department hotulu te leh Aizawl District Magistrate te a office ah a ko a.
He sawihonaah hian Chief Minister chuan central sawrkarah ṭanpuina dil thuai a nih theih nan ruah leh thliin chenna in a tih chhiat te chu chiang taka finfiah thuai turin a ti a. Mizoramah hetiang khuanurel chhiatna a thlen hian tlawmngai pawl ten in an sak sak ṭhin hi central lama rawn endiktu ten in chhia an hmuh tak ṭhin loh avangin an hrethiam ṭhin lo tih a sawi a. chuvangin in chhiate hi thla la vek turin a hriattir a ni.
Tuna chhiat tawkte hnenah ṭanpuina lailawk Disaster Management & Rehabilitaion department aṭangin pek nise a ti a. Hei bakah he department tho hian district tinah ṭanpuina tur sum pe nghal bawk turin a ti a ni.
DM&R Secretary Pu P.C. Lawmsanga chuan ṭanpuina tur sum a awm thu sawiin, Aizawl district tan cheng nuai 25, Lunglei tan cheng nuai 20 leh district dang zawng tan cheng nuai 15 ṭheuh pek tum mek a nih thu a sawi bawk.