Fur khawchhia avanga leimin mai thei leh chhiatna thlen thei thil dang laka inveng turin Aizawl DC office chuan Disaster Zonal Officer-te ko khawmin, an bial ṭheuh-ah In sak him lo leh leimin hlauhawma awmte endik a, report thehlut turin a hriattir.
Aizawl District Disaster Management, Aizawl DC Office leh Aizawl Chanmari khawtlang hruaitute Chan-mari aṭanga Chaltlang pan chhohna kawngpui chhak kopang, min leh mai thei a nih avangin tunkar Thawhṭanni aṭang khan a thawmṭhat hna an thawk a, a him chin anga lang pawh thirlen hmangin an kai bet a ni.
He hnathawh kal lai hi nimin zing khan Parliamentary Secretary Pu Lal Than-zara’n a hmunah a tlawh a, vantlang tana hlauhawm thei thenfai hna thawh a ni chu mipui him nan a pawimawh em em a, helai hmun mai lo pawh Aizawl khawpui chhung-ah In sak sa ṭhiah ngai, mipui tana him lo a awm nual a ni, a ti.