Mizoram-a District pathum tana infiamna lama ruahmanna lian tham 3 awm mekte chu Union Sports Minister chuan tun aṭanga rei vak lovah tihfel a nih tur thu a sawi.
Sawrkar thuchhuahin a tarlan daninMizoram sorkar-in Ministry of Youth Affairs & Sports programme Urban Sports Infrastructure Scheme hnuai atanga hmuh tura a beisei project pathum – Champhai Chhangphut Playfield-a synthetic turf phah turte, Lunglei district Sazaikawn-a Multipurpose Indoor Hall sak, leh Lawngtlai district-a Multipurpose Hall siam tura ruahmannate chu Union Youth Affairs & Sports Minister Pu Jitendra Singh chuan tun atanga rei vak loah Mizoram pek a nih tur thu Sports Minister Pu Zodintluanga a hrilh.
Pu Zodintluanga hi Conference of the State Ministers & Secretaries, May ni 24 leh 25-a Vigyan Bhawan, New Delhi a neihah a tel a, sports hmasawnna tura Mizoram mamawh hrang hrang conference-ah hian a thlen. Pu Zodintluanga chuan Pu Jitendra Singh chu Mizoram-in Boys Hockey Academy, Kawnpuia phullem (astro turf) phah zawh tak chu rawn hawng turin a sawm a, Pu Jitendra chuan hmar chhak bial tlawh thuai a tum a, chumi hunah chuan remchang a awm chuan a hman theih tur thu a hrilh. State Ministers & Secretaries conference-ah hian Union Minister chuan India ram pumpuia state hrang hrang district headquarters-ah District Sports School hawng turin programme a duang chhoh mek thu a sawi a. He school-ah hian hostel awm man, fee leh chaw man tur stipend a siam sak atangin a tumsak dawn a ni.
Pu Zodintluanga hi Sports Secretary Pu R Lalvena, Sports Director Pu Lalzirmawia Chhangte, leh Mizoram State Sports Council Secretary Pu C. Laltlanthanga ten an ṭawiawm a ni.