Laipuitlang chhiatna Magisterial Inquiry Report behchhana PWD hotute mawhphurhtir pawmlo tih sawi

Laipuitlang chhiat tawh chungchanga Magisterial Inquiry report behchhana PWD hotute mawh phurh tir an ni chu an pawm loh thu MNF Vice President Dr. R. Lalthangliana, MLA chuan a sawi.

Dr R. Lalthangliana hian Inrinni-a Tlungvel Group MNF Political Training a hmanpuina-ah he thu hi a sawi a, Congress Ministry hian mawhphurhna tawp a la ngam tur a ni a ti a. PWD changtu Minister a nih angin Chief Minister-in mawhphurhna a nei lian ber nia sawiin, banna a thehlut tura a ngaih thu a sawi a ni.

NLUP chungchang sawiin, MNF Vice President chuan NLUP sum chu Central Sawrkar Planning Commission-in Plan sum aṭanga hai ṭhen phalna a siam tawh avangin tu party pawh sawrkar se kum 2015 thleng an peih emaw peih lo emaw an sem hrim hrim a ngai ang a ti a. MNF sawrkar-in zirtirtu 6,000 vel hrisel lohna avanga pension duh leh chhan hrang hrang vanga pension duhte pension dan tur Voluntary Retirement Scheme (VRS) hnuaia a ruahman fel chu Congress chuan a kalpui hleithei lo tih a sawi a. Hemi atana sum ngai tur vaibelchhe 200 vel Asia Development Bank-in MNF Sawrkar a pek chu sawrkar tawp lam a nih avangin engmah tih hman a nih tak loh thu a sawi.

VRS hmang hian Congress sawrkar chuan zirtirtu 500 vel a chhuah tir a, an chhuahpui tur pawisa hlawm erawh a pe theilo tih a sawi a. He scheme-a pension zirtirtu te aiah hian ṭhangthar lehkha thiam zawk zirtirtu-ah laka, Sawrkar Sikul zawng zawng deuhthaw pawh English Medium anga siam tumna pawh a la tipuitling thei lo chu sawrkar chak lohna a ni a ti bawk

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram