Laipuitlang leimin a\angin ruang 11 la chhuak tawh

Inrinni zing dar 3 vela Laipuitlanga PWD SDO Office building leh a dinna ram minin chenna in 9 vel a hnawl a, nizan zantir thleng khan mitthi ruang 11 lak chhuah tawh a ni.
Hei bakah hian ruang pathum chu hmuh a ni chungin lak chhuah a harsa hle a, nizan khan ruang delhtu concrete beam tihbun an tum a, Inrinni khaw en lai khan ruang 10 lak chhuah hman a ni a, Inrinni zan thim hlimah khan Karimganj khaw mi Zakir Hussein ruang lak chhuah leh a ni a. He mi nen hian he vanduaina thlenga tun thlenga ruang lak chhuah tawh te chu H.Lalnunmawia (42) S/o Romawia, Ramhlun Venglai, Lalrelfela (22) S/o Lalsailova, Ramhlun Venglai, Lal\hasanga (31) S/o H.Lalsangzela, Ramhlun Venglai, V. Johana (45) leh a fanu V.Lalmuanpuii (17), Thingfal khua; Hmingthanpuia Rabung, Lal\hafeli (18) D/o Lalbela, Rabung, Lalduhsaki (37) H/o Vanlalhmuaka, Laipuitlang leh a fanu 2 – Melonie Lalhriatchhungi (13) leh Lalrinzuali (22) te an ni a, Lalrinzuali hi leiminin in a chhilh hnuai a\anga hliam na tak tuara dama lakchhuah a nih hnu lawkah a thi zui leh a ni.
Thi tate ruang hi Inrinni khan an chhungte hnenah hlan a ni a, mi engemaw zat chu Inrinni khan vui nghal an nia, khaw danga mite ruang pawh an awmna khuaah vui tura thawn a ni tawh a. Nimin khan V. Johana leh a fanu V. Lalmuanpuii te hi vuiliam an ni a, Thingfal khaw thlanmualah thlan khur pakhatah phum an ni.
Chin hriat lohva la awm leimin leh in chimin a delh nia hriat mi 6 la awmte chu – Lalrindika S/o Biakchungnunga, Rabung, Lalramnghaki D/o Lalbela, Rabung, Remkima fate 2- Lalrindika leh Zothanpuia, Thingfal, Lalremchhungi, Thingfal leh Vanlalrema Hnamte South Lungpher te an ni a, ruang zawn hna hi chhunzawm zel tur a ni.
Ruang zawngtute hi Aizawl SP Pu LR Dingliana Sailo leh DM & R Director Pu C.Lalpeksanga ten an kaihruaia, Central YMA hruaitute pawhin Information Centre buatsaihin thil \ul apiang an ti a ni.
Leiminin in a hnawl hnuai a\anga Inrinnia dama lakchhuahte chu Lalhlimpuii D/o V.Johana, Thingfal, Numberliani Ramhlun Venglai, Lalrinsiama Rabung, Remruati Ramhlun Venglai, Joseph-a leh Laldinhlimi Ramhlun Venglaite an ni.
Heng mite leh hliam dang te chu Inrinni khan Aizawl Civil Hospitalah lak an ni a, Aizawl Civil Hospital panpui zawng zawng chu 10 an nia, an zinga 3 chu admit an ni a, ruh tliak 2 pawh Inrinni khan zai nghal an nia, thih hlauhthawn awm khawm a na an awm lo a ni. Hliam dang 7 te erawh chu an zia awm deuh avangin first Aid pek hnuah chhuah tir leh an ni.
Chhanchhuah leh ruang lak chhuah hna hi Mizoram Police a\anga din, State Disaster Response Force mite’n an thawk a, heng mite hi Central YMA hnuaia chhanchhuahna hna thawk tura Rescue team dinte’n an pui a, nung dama chhanchhuah tur an la awm beiseiin JCB leh khawl lian hmang lovin, dimdawi takin drilling machine te, thir chheh bunna chaicheh lian te, bang chhut pawhna hmanruate an hmang a ni.
He vanduaina thlenna hmunah hian Aizawl Civil Hospital a\angin Medical Team, oxygen leh damdawi chi hrang hrang nen an awm bawk a, thil tih \ul apiang rang takin an ti nghal a ni.
He chhiatna thlenga thi ta te ruang leh an chhungte phurh nan State Transport Deptt. chuan bus 4 a tir chhuak a, chungte chu Rabunga kal turin bus 2, Thingfala kal turin bus 1 leh Ngopaa kal turin bus 1 a ni. Hemi chungchanga Transport Deptt. hotute sawi danin hemi vang hian State Transport Deptt. chuan Thawh\anniah Aizawl a\angin lamhla kal tur bus a tir chhuak dawn lova, Ticket lo la tawhte chuan an ticket man booking counter a\angin an la let thei ang a, a kal hun lo thleng leh tur an nghah duh chuan chuta tan chuan an hmang thei bawk dawn a ni.
He chhiatna thleng te \anpui na’n hian nimin tlai thleng khan `2,80,000/- vel hmuh tawh a ni a, leiminna hmun chunglam khuhna atan hian sawrkar chuan Silpauline a pe a, hnatlang te tan hian Salvation Army \halai chuan thingpui leh chhang tumin Inrinni zan khan mi tlawmngai tlaivar engemaw zat an awm bawk a ni.
Hetihlai hian, CYMA Central Executive Committee (CEC) Emergency Meeting, nimina \hukhawm chuan chhiat tawkte tanpui na’n hian Aizawl khawpui chhunga Branch hrang hrangah Vehbur khawn nise an ti a. Branch hrang hrangte’n May thla chhungin Central YMA-ah thehluh nise an ti. Hei bakah hian Mizoram hmun hrang hranga YMA Sub-Hqrs te’n an hnuaia branch te vehbur khawn dan tur chungchangah a \ul dan angin ruahmanna lo siam se tih a ni bawk.
Laipuitlang leh Ramhlun Venglai chhiat tawhna chungchangah thu thar a awm apiangin FM Zoawi chuan a puang zel a ni.

Leave a Reply

This site uses Akismet to reduce spam. Learn how your comment data is processed.