Chief Minister Pu Lal Thanhawla chuan loneimi leh kuthnathawktute hi khawvela mi pawimawh berte an ni a, an tel lo hian ram a kal theilo a ni a ti.
Agriculture Department (Crop Husbandry)-in nimina Farmers’ Meet 2013 Vanapa Halla an buatsaih a hmanpuinaah Chief Minister chuan he thu hi a sawi a, Chief Minister chuan Ei leh bara kan intodelh theihna tur kawngah min ti phurtu atan ‘Buh Thar Tam Kum’ leh ‘Kuthnathawktute Ni’ te anmahni puala kan hman tawh thu te a sawi a, Mizorama kuthnathawktute pawh sawrkar-in lei rem rah tira, eizawnna ngelnghet siam sak turin NLUP a kalpui a, tun kum nga chhung hian chhungkaw 1,35,000 tuam turin sum pawh a awm vek a ni a ti a, NLUP kalpuina tur hian sawrkar department chanvo sum pakhatmah pawh pen a nih loh thu sawiin, chutiang sawi an awm a nih chuan dawt an sawi a ni a, itsikna ṭawngkam mai a ni a ti.
Chief Minister chuan sorkar-na siamtu MLA 32 te hi Mizo mipuite tawngtai chhanna an nih avangin thil diklo an tih lohna turin lepse ngamin an kal a, eirukna leh corruption chi hrang hrang lakah fihlim turin fimkhur taka an kal thu a sawi a, midang zawng zawngte pawh hetiang lakah fihlim tir tumin midangte tana malsawmna thlentu nih hi an duh ber a ni a ti.
Thiamna lamah chuan mipangngai ve mai anih thu sawiin, Pu Hawla chuan mithiamte thluak vai vir chungin hmasawnna kan hmu thei tih kan hria a ni a ti a. Chuvangin agiriculture leh horticulture bikah kuthnathawktute chu mithiamte kaihhruai tirin, tlangram lo neih pawh 48% velin a tlakhniam phah tawh a, hlawk zawk leh scientific zawkin NLUP hmangin lo neih kalpui mek zel a ni a ti bawk.
Khualzahawm Pu H.Liansailova, Agriculture Minister pawhin thusawiin, kan thil tih reng rengah hmathlir tha tak kan neih a tul thu a sawi a. Hei hi tihlawhtling turin ruahmanna fel tak siam a hmala in, tuchhuan lokal zel turte tana chhenfakawm siam hi kan tum a tha hle a ni a ti a. Loneitute zingah mi taima, hlawhtlin tum tlat tam tak an awm tih sawiin, Pu Liansailova chuan lawmman la tlak veka hnathawk an ni a ti a. Pu Lal Thanhawla’n kuthnathawktute khaichhuahna tura hmathlir tha tak a neih chu hriatpui a, tumruhna leh chhelna nen thawk turin a fuih a ni.
Farmers’ Meet-ah hian district hrang hrang atanga Oil Palm ching hlawhtling bik thlanchhuahte leh Buh thar tam te hnenah kum 2012 chhung atan lawmman pakhatna `20,000/- leh Citation, pahnihna `15,000/- leh certificate leh pathumna `10,000/- leh certificate hlan ṭheuh a ni a. Pi Kaphliri, Bungkawn, Aizawl chu kumkhat 2012 chhunga a lo-ah buh, vaimim, purun leh antam, zikhlum cheng nuai hnih chuang man a thar avangin Special Award hlan a ni bawk.
Inkhawm hi Pu Lalram Thanga, Principal Secretary, Agriculture in a kaihruai a, Plan 11th chhunga Mizoram mamawh buh thar chu 20% chauh anih laiin, Plan 12th chhung chuan buh metric tonne 1,06,000 (60%) thar tum anih thu a sawi.
Farmers’ Meetah hian district tin atanga loneimi 400 tel tura thlan chhuah zingah mi 336 an kal a ni.
