Education Minister Pu Lalsawta hova nimina Aizawl-a Advisory Board of Education (SABE) ṭhukhawm chuan, zirna hmasawnna tur hrang hrang an sawiho a, he ṭhutkhawmnaah hian Mizoram-a Engineering College din ve a ṭul tawh thu sawi lan a ni.
Nimin chawhma dar 11 khan Directorate of School Education Conference Hall-ah State Advisory Board of Education (SABE) hi Pu Lalsawta, School Education Minister hovin an ṭhukhawm a, he meeting Pu Lalsawta, School Education Minister kaihhruaiah hian ngaihtuah tur Agenda 22 zingah Mizoram-a Engineering College din ve a tul tawh thu sawi lan a ni a, Mizo naupang ten State pawn pan buai ngai lo a keimahni State chhungah man tlawm zawk leh hautak lo deuh zawka Engineer an zir ve theih nan Mizoram State Engineering College neih ve hi a ṭul viau tawh thu member ten an sawi a.
Hei bakah hian Champhai leh Kolasib Polytechnic tana post siam belh dilna te, JEE, JEE-Advance leh NEET te hi National Level Competitive Exam an nih avangin Mizo naupang a tam thei ang ber an tlin theih nan tun dinhmun a Class-XIl (Sc.) awmna District hrang hrangah te hian JEE/NEET Coaching Class buatsaih ni thei se tih sawi ho a ni bawk.
Mizoram Polytechnic, Lunglei-a Seat awm theih zat tih tam te, Aizawl-a Polytechnic thar din ṭul dan te Mizoram State Open School chungchang te bakah Education atana thil pawimawh tak tak te sawiho a ni.
Nimin ṭhutkhawmnaah hian Education chungchang thil engemawzat an sawiho zingah Primary, Middle, Highschool, Higher Secondary, College leh Professional zirna in leh a enkawl chungchang ṭhahnem tak sawiho a ni bawk.
Meeting-ah hian Commissioner & Secretary, School Education Department, Director School Education Department; Vice-Chancellor Mizoram University te bakah State Advisory Board of Education (SABE) member pawimawh tak tak te an tel.