MPC, ZNP leh MNF party thalai te nimina Joint Meeting Top Chef-ah an nei a, Mizoram plan fund pung chhe lutuk chu Chief Minister tana mualphona tawpkhawkah an ngai tih an sawi.
Party pathum thalai Elected Office Bearers nimina \hukhawm chuan thuchhuah siamin NLUP hi Sawrkar Programme leh policy a ni a, Congress party-in anmahni pawl bil induhsakna leh invohbikna atana an hmang leh Mizoram mipui pawisa, mipui Budget Party bil ham\hatna atana an hmang hi Constitution bawhchhiatna a ni an ti a. Democracy ram-ah mitinin zalenna kan nei a, 2008 MLA inthlan dawna an intiam tawh ang ngeiin, NLUP hi chhungkaw tin hnenah cheng nuaikhat-in 2013 MLA Election puan hma ngeiin pe ngei rawh se an ti.
Pu Lal Thanhawla, Mizoram Chief Minister-in kumin 2013-2014 Mizoram Plan Fund atan sawrkar laipuiah cheng Vaibelchhe 2799 a dil laia, Central sawrkarin cheng vaibelchhe 2500 chauh an lo pe chu mak an tih thu leh Pu Hawla an lainat thute, a dil ang zat Plan Fund rawn pe duhlotu, Sonia Gandhi kaihhruai UPA sawrkar an dem thute an tarlang.
NE State dang, Arunachal Pradesh kumin Plan Fund, Rs. vbch 3700 a nihlai leh za zela 17.44 a a pun laia, Mizoram plan fund pung chhe lutuk chu Chief Minister mualphona tawpkhawkah an ngai tih sawiin ‘Sawrkarin 2013 NLUP atana a sum dah Rs vbch 450 hi Special Package hmuh a nih loh chuan, Plan fund a\anga NLUP sem a nih vanga harsatna kan tawh mek te, sawrkar sum harsatna nasa tak avang hian, kumin Plan Fund a\ang chuan sem chhunzawm chi ah kan ngai lo a ni’ an ti. Sawrkar thuchhuaha Plan Fund punna 19.5 % anga tarlan hi thudik lo a ni an ti bawk.
Thuchhuah chuan Inner Line Regulations lekkhawh chungchangah hian rorellai Congress party a muthlu nasa hle a. ILP neilo leh ILP lem hmangin hnamdangte kan ramah an vei thelh ta sung sung mai hi a ngaimawhawm tiin a rang thei ang berin Mizoram sawrkarin he thil hi enfiah se, dan bawhchhetute man chhuahna kawngah hma la nghal se an duh tih an tarlang bawk.
Duhsak taka kan rama sumdawn phalna an pek leh Lengte EPIP ram loan lak nana dahkham phalna an pek – Mizoram ISPAT Industry-in Iron rod quintal sang tam tak an siam chhuah hnuah pawh Mizo \halaite hnena hnathawh tur vawiin thlenga an la pe lo ni sawiin an hriatthiam loh thu leh an intiamna anga an awm leh awm loh enzuipui lotu sorkar an dem thu an sawi a. Mizoram Ispat Industry thuneiute’n an intiam ang ngeiin Mizo \halai 3000 tal hnenah hna an pek dan tur ruahman nghal turin Mizoram sorkar an ngen tih an tarlang bawk.