Kumin March thla chhuak Mizoram State AIDS Control Society Revalidation report-ah chuan Mizoram-ah mi 10,750 vel ruihtheih thil, heroine, proxyvon leh parvonspas a inchiu thin awm nia tarlan a ni a, damdawi dang hmangsual mi 30,000 vel an awm ni a sawi a ni bawk.
He thu hi UNODC project Co-Ordinator Kunal Kishore-an nimina thuthar thehdarhtute Aizawl-a a kawmnaah sawiin, Mizoram chu ruihhlo hmansual leh a hmangsualtute enkawlzui na kawngah a hranga dân nei lo State zingah ala tel a, hemi kawnga Mizoram-in dân a duan Narcotics and Psychotropic Substances Rules 2004 chu Law enforcement lam te tih chin tur thliarna chauh a nih avangin a inenkawlna tur lam telna policy ṭha, dan kengkawhtu lam leh a enkawltu lam department zawng zawngte bakah, heti lam buaipuitu pawl leh kohhran te thlenga ṭha zawka an thawh ho theihna tur kalphung fel zawk duan a ṭul a ni a ti.
Tunlaia ruihtheih thil siamna atan a hman ṭhin Pseudoephedrine chu Uttrakhand leh Himachal Pradesh aṭanga siam a ni tih sawiin, hengte hi Delhi-ah Drugs hmanga sumdawngte hnenah hralh ṭhin niin, India hmarchhak state hrang hrang, a bikin Mizoram-ah lakluh a ni a, heta ṭang hian Myanmar-ah siam puitlin a ni a, hemi hnu hian ramchhung hmun hrang hrang leh South East Asia leh Europe ramah te thawn darh a ni tih Pu Kishore chuan a sawi a. Mizoram chu heng damdawi hmansual theih sumdawnna a hman chet kual tirna atana kalkawng ber a nih avangin hemi laka invenna dân neih chu ngaihpawimawh a ngaih thu a sawi bawk a, he sumdawnna hi nasa leh zuala ven a ngai hle a ni a ti bawk.