MNF hi ka chunga roreltu tur an ni lo : Lal Thanhawla

MPCC President, Chief Minister Pu Lal Thanhawla’n, kohhran leh Pathian pawi a sawi a nih chuan a chunga roreltu tur chu MNF-te ni lovin, Zarkawt Presbyterian Kohhran a ni, a ti.

He thu hi nimina Congress Bhavan-a Political Session-a thu a sawinaah a sawi tel a, Pu Lal Thanhawla chuan, “MNF hian lo hria se ka duh chu, ka rinna kawltu an ni lo” tih hi a ni, a ti a, “Hmanah Kristian State kan siam ang” tih thu-ah High Court-ah min khing a, Pathianin mal a sawm lova, an hlawhchham hulhual a. Anmahni hi Hindu Pathian bia-te hmaa intulut, sut leh theih tawh loh tur a thu tiamtute kha an ni a. Kei hian Kohhran leh Pathian pawi ka sawi a nih chuan ka chunga roreltu tur chu MNF-te ni lovin, Zarkawt Presbyterian Kohhran an ni” a ti.

Pu Lal Thanhawla chuan tun hnaia Mahasen Cyclone lo thleng tura mithiamte hmuh dan leh Mizorama rin anga a thawh leh tak si loh chungchang sawiin, “Sawrkar ang chuan theih tawpin inbuatsaih mah i la, kan innghahna lungpui chu MNF ho buaipui ang mai mai ni lo, Pathian nung a ni a. Chu kan Pathian, min vengtu hnenah chuan Mizoram mipui hian tih tak zetin lawmthu i sawi ang u” a ti.

He Political Session hi MPCC General Secretary Pu C Lalpianthanga’n a kaihruaia, Education Minister Pu Lalsawta pawhin thu sawiin, “Congress Sorkar hi mumal nei takin a kal a. Kan hotupa Chief Minister zahawm tak ho hian India Constitution hnuaia thu kan tiam ang taka kalin mahni duh thu emaw tute’n emaw vawk an lo talh vang emaw ngawtin thil kan ti ve lova. Dan palzuta Health Care Sum Vaibelchhe sawm lai mahni fanu-te thawhna Banka dahpun te kha kan ti ve lo a ni” a ti.

He inkhawmah hian Pu R. Thangzova, Govt Complex chu Congress-ah lawmluh a ni a. media Department Chairman Pu C.Lalruata leh Media Department Secretary Pu Lalrozara ten tunlai Mizoram Politics chungchang chipchiar takin an sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram