Serchhip News

Motivation Campaign nei

NLUP hnuaia Captive Farming kalpui turah Tuikum Cluster chhunga khaw thlan chhuah 11 te tan Zirtawpni khan Chhingchhip Mualpui-ah Motivation-cum-Awareness Campaign neih a ni a, NLUP Marketing Cell Chairman,Wdr. Lalnghinglova’n a hmanpui.

Captive Farming atan hian Tuikum cluster chhunga khaw 11 – Baktawng, Baktawng Tlangnuam, N.Chawilung, Chhingchhip, Chhingchhip Mualpui, Khumtung, Phul-mawi, Hualtu, Hmuntha leh Khawbel te chu sapthei ching tur atana thlan an ni a. Nimina Motivation-cum-Awareness campaign ah chuan Resource Persons ten beneficiary te chu sapthei chin a hlawk dan te, a chin tur variety te, a puitlin hun chhung leh ram hectare khata thar chhuah theih zat te hrilhin captive farming hnuaia sapthei chingtu te chuan an thar chhuah hralhnaah harsatna an nei dawn lo va, MIFCO in leiba awm lovin a vaia a laksak vek tur thu te an hrilhfiah a ni.

NLUP hnuaia Captive Farming kalpui turah hian MIFCO Ltd, FRONTUS(Frontier Tribes Upliftment Society); SHDC (Sinlung Hills Development Council) leh Horticulture department te chu Implementing Agencies atana ruat an ni a. Sapthei Captive Farming hi MLA bial 7, Tuikum, Hmuifang, Lengteng, Tuichang, Hrangturzo, Chalfilh leh Tuivawl ah te kalpui tum niin hemi atan hian chhungkaw 2000 sapthei ching turin ruahman a ni a. Tuikum cluster area chhungah hian sapthei chingtu tur chhungkaw 575 ruat an nih laiin VC te report-a a lan dan chuan NLUP beneficiary chhungkaw 800 chuangin captive farming a luh hi an duh a ni. He hunah hian heng khaw 11-a VC hruaitute leh kut hnathawktu ṭhahnem tak an tel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram