India hmarchhak mi hlangin khawvela tlang sang ber Mount Everest lawnchhuah tuma an beihna chu a hlawhtling thawkhat ta a, niminpiah zing dar 7 leh 7.30 inkar khan he team zinga member pathum chuan tlangchhip an thleng a. Nizan khan member tam zawkin lawnchhuah ve leh tumin an bei leh a ni.
1st North East India Mt. Everest Expedition-ah hian member 16 awmin, tlang lawn tak hi mi 11 an ni a. He Expedition team-a base camp manager Vanlalliana sawi danin, nizan hmasa dar 10 vel khan riahbuk an sualna hmun tawpna ber, Camp IV, metre 7920 a sang atangin a chhip, metre 8850 a sang thlen tumin an thawkchhuak a ni. Camp IV bul ‘South Col’ an thlenin, darkar khata kilometre 60-a chaka thli thawk leh vur sur vangin a tam zawk in an chhunzawm thei lo a, an zinga mi pathum erawh chuan a chhip thlen tumin an bei a, heng mi pathum zinga a thleng hmasa ber hian niminpiah zing dar 7 vel khan a chhip a thleng a, midang pahnih hi a hnungah an thleng zui ve leh a ni.
Team member dang te hi oxygen leh ei tur an tlakchham deuh tawh avang leh, tlang lawn hi zana tih a ngaih avangin ‘South Col’ ah hian an chawl rih anga, nizan dar 9 khan a chhip thlen nana an la bak metre 800 vel chu thlen chhoh tumin an thawkchhuak ve leh ang.
Manipur Mountaineering & Trekking Association leh Manipur sawrkar huaihawta he expedition neih hi North Eastern Council-in senso a tumsak a. Mizoram atangin climber David Zohmangaiha leh base camp manager atan Mizoram Sports & Youth Services deptt. a Head Adventure Vanlalliana te an tel a ni.