MZP-in Mizoram Lok Ayukta Draft Bill thehlût

Mizo Zirlai Pawl (MZP) chuan nimin khan kan rama hlemhletna leh eirukna te alo kiam a, chak zawka do a nih theih nana ṭul ang leh chak zawka hma la theitu tur Mizoram Lok Ayukta Draft Bill MZP-in a buatsaih chu Chief Minister Pu Lal Thanhawla hnenah an thehlut.

Chief Minister chuan Mizoram-ah Lok Ayukta din a nih theih nan chak taka hmalak mek a nih thu leh chak lehzuala lo bawhzui a tum thu MZP hruaitute hi alo hrilh niin thulakna chuan a tarlang.

MZP chuan Chief Minister hnenah hian Mizorama Gorkhali ten Other Backward Classes (OBC) dinhmun an dil chungchangah leh Mizoram sawrkarin Dawrpui khawtlang hnena Civil Hospital ram Multi Purpose Centre atana a sahthlak chu sut leh tura ngenna Memorandum an thehlut nghal bawk a ni.

MZP chuan High School zirtirtu la tura inkaihhruaina, Recruitment Rules dinglai mek chu thalo an tih thu thlenin, subject hrang hrang zirtir tur bik zirtirtu lak an nih theih nana ruahmanna thar siam turin an ngen a, High School bikah Graduate hrim hrim tan subject zawng zawng zirtir a harsat avangin Mathematics leh Science subject bik phei chu B.Sc leh B.Com tan lo chuan zirtir ngaihna pawh a awm lo hial a ni an ti a, hetihlaia High School zirtirtu tur lak an nihin hna dil thei chin tehfung atan ‘Recognised University aṭanga graduate zawng zawng’ tih anih thin avangin subject hrang hrang zirtir tur bik lak an ni thei ṭhin lo a, chu chuan nasa taka harsatna siamin school hrang hrangah zirtirtu, a bikin Mathematics leh Science subject zirtirtu tur indaihlohna siamin Mathematics leh Science zirtirtu nei mumal loin zirlai tam takin HSLC exam an hmachhawn phah fo ṭhin a ni, an ti.

Heng bakah hian, Education budget tihpun chungchang, Mizoramin High Court hranpa a neih theih nana hma laksak tura ngenna te, Mizoram District zinga MPSC exam centre la nei lo district 3 Mamit, Lawngtlai leh Kolasib District te a MPSC examination centre dah a nih theih nan leh khawi hmun aṭang pawh a Income Certificate lak chhuah a nih theih nana hma la tura ngenna an thlen bawk a ni.

Chief Minister chuan an thil thlen te hi chak taka lo bawhzui a tum thu a hrilh a, Mizoram-ah Lok Ayukta din a nih theih nan chak taka hmalak mek a nih thu leh chak leh-zuala lo bawhzui a tum thu a sawi bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram