Chhattisgarh-a Inrinni-a Naxal-hovin Congress party mite an beihna hmuna nimin zinga ruang 11 hmuh belh leh a nih hnuah he pawi khawihna thlenga thi zat chu 28 an tling tawh a, ruang hmuh belh zingah hian Naxal-ten ahmaa an lo rukbo, state Congress President, Nand Kumar Patel leh a fapa, Dinesh Patel te ruang a tel a ni.
Congress party-in Sukma District-a Darbha Ghat-a ‘parivartan yatra’ an buatsaiha telte, state Congress hruaitu pawimawh tak tak leh party mi-te chuanna motor 40 vel inzui chu Jagdalpur bulah civil thawmhnaw inbel Maoist 250 vel rualin an lo bei a, a hmunah mi 17 thi nghalin heng zingah hian an party hruaitu pawimawh Mahendra Karma pawh a tel a ni. Midang 32-in hliam tuarin a na zual zingah Union Minister hlui, VC Shukla a tel a, Pu Shukla hi a dulah silai mu 3 lutin nimin khan Gurgaon-a Medanta Medicity Hospital-ah zai a ni.
He damdawi in Medical Bulletin-in a sawi danin Pu Shukla hi a la ngaihtuahawm hle a, doctor thiam rualin an vil reng a ni.
Hliam tuarte hi Prime Minister Dr Manmohan Singh-a leh Congress President, Sonia Gandhi-ten vawiin khan damdawi in-ah an kan a, Prime Minister chuan he pawi khawihna thlenga thi chhungte hnenah tanpuina cheng nuai 5 theuh pek an nih tur thu leh hliamte chu cheng sing 5 theuh pek an nih tur thu a puang a ni.