ONGC Corporate Social Responsibility Group chuan Hortoki khuain tui hnianghnar an hmuh theihna turin tuilakna tur senso cheng nuai 88.45 chu an tum vek dawn.
Oil and Natural Gas Corporation (ONGC) Limited hnuaia Corporate Social Responsibility Group hotute hian Inrinni tlai khan Chief Minister Pu Lal Thanhawla chu a chenna bungalow-ah an hmu a. Hortoki khaw tui pekna hna thawhna atana pawisa hman tur installment hmasa ber cheng nuai 42 demand draft chu Pu Lal Thanhawla hnenah hian General Manager(E&T)-CSR PC Agarwal chuan a hlan a ni.
Mizoram Public Health Engineer Department-in Hortoki Water Supply Scheme an duan chhuah sak a. A senso tur zawng zawng (project cost) an chhutchhuah, cheng nuai 88.45 chu ONGC Ltd in a tum vek tur a ni a. Hna pawh hi PHED in thawk dawn a. Hna ṭan hun tur ni emaw lung phum hun tur ni remchang turte an sawiho nghal bawk a ni.
Chief Minister hi Pu S.Hiato, PHE Minister leh Pu Hmingdailova Khiangte, MLA leh PHED official ten an ṭawiawm a ni.