India mi Pakistan tanina tâng Sarabjit Singh chu nizan hmasa zanlai pelh hnu khan amah enkawl mekna Lahore-a Jinnah Hospital-ah a thi.
Jinnah Hospital-a Medical Board hotu Mahmood Shaukat-a chuan Sarabjit Singh thih thu hi amah enkawltu doctor-in nizan hmasa dar 1:30 am khan telephone-in a hriattir tih a sawi a ni. Medical board member zinga Sarabjit Singh enkawltu doctor pakhat chuan Sarabjit Singh hi lungphu chawla thi a nih thu a sawi a ni.
India mi Sarabjit Singh hi a tânpui-ten Zirtawp kalta April ni 26 khan Lahore-a Kot Lakhpat taninah an sawisak rawn a, Hliam na tak tak a tuar nual nia sawi a ni a. Jinnah Hospital, Lahore-ah enkawl a ni a. External Affairs Ministry pawhin inenkawlna tha zawk pe tura India-a Surabjit Singh lak hi Pakistan hnenah a lo dil tawh a. Mahse, Pakistan chuan Sarabjit Singh chu enkawlna \ha thei ang ber Lahore damdawiina an pek ve tho avangin hmun danga thawnchhuah an tum loh thu an lo sawi ve bawk a ni.
Pakistan Jail a na tak a sawisak avanga Lahore Hospital a nizan hmasaa thi ta Sarabjit Singh thih chungchang a mawhphurtute hrem tur a Pakistan ngen in, India chuan a ruang India a rawn thawn turin a ngen a. Prime Minister Dr Manmohan Singh-a chuan mihring nihna hmakhawngai a Sarabjit Singh chungthu ngaihtuah tura N.Delhi ngenna Islamabad in a ngaipawimawh lo chu pawi a tih thu a sawi a, rawng tak a kut thlak a tawrhna a mawhphurtute chung a dan ang a rorel \ul a tih thu a sawi.
Exteral Affairs Ministry chuan Sarabjit Singh thihna chu Pakistan Jail thuneitute kut a awmlai India mi thahna ani tih sawiin misual te man ngei an nih theih nan a uluk tak a thil chhui anih a ngiat a ni. Punjab sawrkar chuan Sarabjit Singh ruang chu India a rawn lakluh a nih hunah sawrkar chawimawina nen vuiliam a ni dawn tih a sawi a, hetihlai hian Sabarjit Singh ruang hi Lahore Hospital-ah Indian Official te kut a hlan a ni tawh a, a ruang India-a rawn hawn tur hian Air India thlawhna a bik a buatsaihin nimin chawhnu khan Lahore panin Amritsar a chhuahsan a ni.