Sawrkar laipui chuan Maoist ho chet thinna State te chu Political Party worker venhimna tiuluk zual tur a ngenin, Naxal hovin Chhatisgarh a Congress hruaitute an beih avanga politics thil tihna tharum thawh a chetna chi reng reng in a tihbuai loh nan a hmalak turin a ngen.
Union Home Ministry in state sawrkar te hnenah he thu hi hrilhin National Party leh tualto party hruaitute venhimna uluk tak a thlir let a tul tih a sawi a, a tul anih chuang anmahni venhimna pek dan pawh uluk leh zual a siam tur ani, a ti. Political Party hruaitute chu an zinna ah leh inkhawmna a an telna hmun apiangah anmahni venhimna thlahdul tur a ni lo tih sawrkar laipui chuan a sawi bawk. Hetihlai hian, Maoist hovin Congress hruaitute an beih na a mi 28 an thihna thil thleng chungchang chhui hna chu National Investigation Agency (NIA) chuan nimin khan an ṭan a, nmin chawhnu khan Rajpur an thleng ani. Hemi hma hian Union Home Minister Sushil Kumar Shinde-a’n Congress hruaitute beihna hi NIA in an chhui tur thu a lo sawi tawh a, State Chief Minister Raman Singh-a’n remtih na sawrkar laipui a pe tawh bawk a ni. Home Minister chuan NIA thil chhui tir tur chungchang hi Prime Minister Manmohan Singh-a a hriattir bawk.
Tarlan tawh angin silai keng Maoist thahnem takin Inrinni khan Bastar district-ah Congress hruaitute chuanna motor convoy beiin, mi 28 lai an that a, midang 32 in hliam an tuar bawk a ni.