Home Minister Pu R.Lalzirliana’n Saikhumphaia thil thleng chungchangah sawrkar che muang anga sawi chu a dik lo a ti a, he thil thleng chungchang hriat a nih veleh sawrkar chuan chhawm-dawlna hna chi hrang hrang a theih anga rangin a thawk nghal tih a sawi.
Home minister hian nimin khan Champhai DC, Home Dept, LAD, Revenue, DM&R Department aiawhte bakah tlawmngai pawl hrang hrang Central YMA, MZP, MSU leh MKHC te chu Secretariat Conference Hall-ah kokhawmin Saikhumphai chungchang a sawipui a, Saikhumphaiah hian dal, tel, chi, puan sin tur, bungbel, thosilen, silpauline leh tul dangte an thawn nghal tih sawiin, Saikhumphaiah hian Police platoon 3 dah a nih thu leh thla 2 chhung a thlawnin ration pek a nih tur thu a sawi bawk.
Nimin meeting thurel pawimawh zingah Saikhum-phai mipuite tana Relief Camp buatsaih te, an hriselna lam ngaihtuah sak te, an fate zirna khaihlak lova sikul an kal zawmna tur ngaihtuah sak te bakah venhimna lam tha taka thawhte a tel a ni.
Meeting-ah hian LAD Minister Pu P.C.Lalthanliana, Parliamentary Secretary Pu Lalrinmawia Ralte leh Col. ZS Zuala bakah MLA Pu TT Zothansanga te pawh an tel a ni.