Serchhip News

Serchhip-ah Economics & Statistics Office thar hawng

Niminpiah khan Pu Lalkhama IAS (Rtd.), State Planning Board Vice Chairman chuan Serchhip-ah Economic & Statistics Department Office thar a hawng.

Hawnna thusawitu State Planning Board Vice Chairman chuan, Mizote zingah Statistics aia thildang pawimawh zawka ngai, Statistics chu a ve mai maia ngai kan la tam tih thu a sawi a, Statistics hi ram hmasawnna hnuk a ni a, Data leh Information chi hrang hrang lakkhawm behchhanin ram hmasawnna tura hmachhawp (development plan) duan ṭhin a ni a, Statistics hi ramhmasawnna hnathawh (developmental works) innghahna bulpui tak chu a ni a ti bawk. Ram rorelna chungchangah pawh information leh Statistical data neih ṭhat a, chumi hman ṭangkai thiam chu thil pawimawh ber a nih thu a sawi a, Statistical data hmanga information hrang hrang kan neih te hi kan ram himna tura hmalak dan tur kawng hrang hrang kawhhmuhtu atana kan hman ṭangkai a pawimawh a ni a ti bawk.

Thusawitu dang Serchhip District Bawrhsap, Pi Juhi Mukherjee, IAS pawhin District hmasaho – Aizawl, Lunglei leh Saiha tih loha Economic & Statistics Office din hmasakna ber District an ni chu lawmawm a tih thu a sawi a, Serchhip District hi a zau lova, mihring pawh an tlem a, hmasawnna hnathawh pawh ruahmanna mumal tak a awm chuan harsa lova thawh a phurawm hle a ni a ti.

Hawnna inkhawm kaihruaitu Pu Saihlira, Director, Economics & Statistics chuan Statistics hian tun dinhmunah eng nge kan nih? Englai hi nge zir bing ngai a, khawi lai hi nge kan ṭhan lehzualna tur atana ngaihpawimawh zual ngai tih te min hriatchian tir ṭhin avangin a pawimawh em em a, hemi atana data an lakkhawm dawnin mi ṭhenkhat chuan an ngaihpawimawh sak tawk lo ṭhin a, hei hian harsatna tam tak a siam ṭhin niin a sawi a, Sawrkar department hrang hrang te pawh an information leh data te ram hmasawnna tarlanna leh kal zelna atana pawimawh a nih vangin phal takin inhriattir tlan ṭhin ni se a duh thu a sawi bawk.

Niminpiaha Office hawn a nih rual hian Statistical Awareness Programme buatsaih a ni nghal a, he hun hi Pu Lalrikhuma Sailo, Joint Director, Economics & Statistics-in a kaihruai a, Statistical System leh thil pawimawh chi hrang hrang a sawi hnu a inkawmkhawmna hun benglut tak an hmang a ni.

Serchhip District E&S Office hi Pu C.Lian-tluanga, District Research Officer leh a thawhpui staff 4 ten an enkawl dawn a, hnathawh bul ṭan a nih dawn avang leh Serchhip District chu Aizawl District hnuai aṭanga lak hran a nih tak avangin District chhunga data leh information chi hrang hrangte chinfel hmasak ngai a tam dawn a, tun dinhmunah chinfel ngai a la tam dawn avangin Register of Birth & Death leh thildang chi hrang hrang pawh an buaipui nghal thei rih dawn lova, mipuiten an harsatna hrethiam turin an ngen a, a rang thei ang ber a, mipuite’n an duhtawka an dawr theih turin ṭan an lak dawn thu an sawi a ni.

Niminpiaha Economics & Statistics Office hawnna inkhawmah hian Serchhip a Sawrkar pisa hrang hrang enkawltu te bakah khawtlang mi challangte an tel kim hle a ni.

Economics & Statistics Office hian tunah hian Pu V.Thanhranga In, Serchhip AOC veng ami chu an luah mek a, an office hmun tur pawh sawrkarin a ruahman fel sak tawh a, remchang hmasa berah Office building sak hna hi ṭan a ni dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram