Zothlifim Logo
Loading ...
Mizoram NewsMizoram News

Kaladan Multi Modal Transit Transport Project in a tihchhiat tur ram neitu intelkhawm, KMMTTP Land Owners Association chuan Sipai chakna hmanga ram neitute rapbet ah sawrkar an puh.

Nimina Lawngtlai Press Club a Thuthar thehdarhtute an kawmnaah ram neitute chuan, State leh LADC Sawrkar leh Tlawmngaipawl aiawh ten ram neitu diktak an enfiah a an pawmtlan mi 430 ten Compensation an hmuh tur ang an hmuh thuai theih nan Sawrkar chu Notification tichhuak turin an phut tih an sawi a, State sawrkar lamin Multi Modal Project bikah District Collector hna chauh thawk tura LADC-a Senior Revenue Officer a ruat chu LADC Sawrkar chuan a pawmlo ni a sawiin, hemi avang hian tun dinhmunah Kaladan Multi Modal Transit Transport Project-ah Collector an awm lo a, ruat ni thuai se an duh tih an sawi bawk.

Kaladan Multi Madal kawngpui laih mekah an harsatna te sawiin Land Owners Association te chuan nimin khan Lawngtlai Press Clubah thuthar lakhawmtute an kawm a, Land Owners hruaitu ten an sawi dan chuan Kaladan Multi Modal Transit Transport Road ( KMMTTP) ah hian kum 2008 December ah khan Notification a chhuak a, kum 2009 kum tirah Nodal Deptt. PWD ten Survey an \an a, Survey neihnaah hian DC lam leh District Council lam aiawh telh an ni lo a. PWD lam chauhin Measurment hi an la a ni an ti. Hemi \umah hian mi 160 velin Inhmun Pass leh Garden Pass PWD hnenah an submit a, mi \henkhat Pass submit tum te chu 2nd phase leh 3rd phase ala awm thu leh an Pass te chu lo kawl \ha rih turin an hriattir niin an sawi bawk.

Heta Pass thehlut mi 160 zinga mi te pawh hi tunah hian an vaiin Compensation hi an la pe zolo niin an sawi a, hetianga 2nd phase an nghah reng lai hian PWD lam chuan km 80 lai mai chu Degraded Jhum Land a ni e tiin LADC-a Forest Department-ah lo sign tirin, Forest Department tan hian Cheng Nuai 1497 chu an lo Sanction a, hei hi mipui hriat miah loa an lo tih a nih thu an sawilang bawk. Hetiang teh nuaih a nih vang hian helaia Pass neite chuan DC hnenah an pass te an submit ta a, chu chu Lai Student Association, Central YLA, PWD, Land Owners, LADC-a Senior Revenue Officer leh Addl. DC ho in DC Chamber ah endik a ni a, hemi \umah hian Pass 430 chu a dik tia pawm a ni tiin an sawi.

Lairam Gospel Centenary lawmna Nikum 2012 November thlaa neihah Chief Minister Pu Lal Thanhawla chuan Mizoram-ah Degraded Jhumland a awm theih loh thu leh ama hoa hmala tura a insawi thu leh Compensation pawh an lâk vat tur thu a sawi niin an tarlang a, chutia Compensation la mai tura an inngaih laiin tun thlenga an la hmulo chu ngaithiam lovin, Stay Order an pe ta a, chu chu ngaithiam lovin Sawrkar chuan Sipai tir lutin, sipai vênna hnuaiah hna chu thawh luihtir an ni hi kan ngaithiamlo hle a ni an ti a. A rang lama Sawrkarin an ram laih chhiat man Compensation chu pe tura an phut thu leh an hmulo a nih chuan hma an lak zel tur thu an sawi bawk.