Thlipui laka inventhawn thu-ah School chawlh puang

THLIPUI, Cyclone “Mahasen’ thawk mekin vawiin hian Mizoram a nuai tel ve rin anih avangin inventhawn thu ah sawrkar chuan vawiin chawhnu atangin sikul chawlh a puang a, College tel lovin Higher Secondary School chin hnuai lam zawng te vawiin chawhnu-ah school khâr tur a ni a, Zirtawpni-ah nileng atan khar tur a ni bawk.

Hemi chungchanga Chief Minister thuchhuak chuan, Ningani chawhnu aṭangin zirna in zawng zawng, college tiam loin Zirtawpni thleng khâr vek turin a ti a, Ningani zan leh Zirtawpni-ah te sawrkar function leh mipui punkhawmna ang chi buatsaih loh nise tiin ngenna a siam bawk a ni.

untitledNew Delhi-a Indian Meteorological Department-a Cyclone Warning Division-in sawrkar a hriattir danin Cyclone ‘Mahasen’ zanin dar 9:30 leh dar 10 vela Mizoram lo thleng tura rin a ni a, Lunglei leh chhim lamah chuan darkar khatah km 45 aṭanga 55 vela chaka tleh tura ngaih a ni a, he thli chhia hi ruahpui pai thliin a zui rin a ni a, hei hian darkar 24 thleng awh tura ngaih a ni bawk. A kawng hi Lunglei aṭangin hmar lamah Aizawl lo pheiin, Champhai lampang a chho dawn nia hriat thar a ni.

Hemi avang hian Chief Minister Pu Lal Thanhawla chuan mipuite chiai lo tura chah nawn lehin, mahni theih ang tawka inralring tur leh Pathian thil tihtheihna a innghat turin a ngen a. Sawrkar department zawng zawng pawh an theih anga inralring turin a hriattir bawk a ni.

State chhungah chhiatrupna thlen thulhah Disaster Response Force mi 400 vel an awm a, a ṭulna apiangah heng mi tlawmngaite hi koh theih reng an ni tih sawiin Chief Minister chuan, chhiattawk an awm a nih chuan mahni awmna District thuneitute a rang lama hriattir ni se a ti bawk a ni.

Hetihlai hian, Cyclone tleh tura sawi hi pawng chiai pui tur a ni lo tih Mizoram sawrkar Science and Technology Wing Principal Scientific Officer Dr Vanlalzara chuan a sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram