Mizoram leh Tripura ramri-a boruak ṭha a awm theih rih loh avangin Tripura relief camp-a awm mek Tuikuk raltlante laklet chhunzawm hun tur hriat theih a ni rih lo.
Home Department Joint Secretary Pu Lalbiakzama’n a sawi danin Union Home Ministry chuan May thla hapta hnuhnung berah Tuikuk raltlan laklet hna hi chhunzawm ni se an duh thu an sawi a. Hemi kawngah hian Mizoram leh Tripura sawrkar chu lungrual taka ruahmanna siama thilti tlang tura an duh thu an rawn hriattir a. Hmanni-a hemi chungchang sawiho tur leh raltlan awmna relief camp-a awmte dinhmun enfiah tura kal tum Mizoram sawrkar official te chu ramri boruak a la ṭhat loh avangin kal rihlo turin Tripura sawrkar official-te’n thu an rawn a. Tun thlengin Tripura lam hian engmah thu thar an la rawn neih rihlo nia thudawn a ni.
Hetihlai hian Tuikuk raltlan hotute chuan raltlan lakir tur hian ruahmanna siam ni mahse, a tam zawkin Mizorama kir an duhlo niin an sawi a ni.
Mizoram Bru Displaced People’s Forum (MBDPF) President Pu A.Sawibunga chuan kumin atan thlawhhma lak theih a nih dawn tawh loh avang leh an kir leh hun tura ruahman hi fur chhia a nih tawh dawn avangin a tam zawk an kir duhloh a rin thu a lo sawi tawh a ni.