Mizoram News

Vaphai mipuiten lungawi lohna lantir

Saikhumphai bawk ṭhiah Court-in a khap avanga Vaphai mipuite lungawilohna lantirna kalzelah, nimin khan Vaphai khaw mipuiten an khawchhungah kawng an zawh a, Saikhumphai bawk chu anmahni hâl nilovin High Court hâl a ni an ti a, Thawhṭanni-a an chêtnaah Police ten tear gas hmanga pungkhawm hnawhdarh an tum chu an dem thu an sawi a ni.

Tarlan tawh angin, Champhai District-a Saikhumphai bawk ṭhiat lo tura High Court thupek dinglai bawhchhiain Vaphai khaw mipuiin Thawhṭanni khan Saikhumphaibawka In 40 chuang an hâl a, Police-te’n mittui tlâkna hlo hmanga dan an tum laia innek buaina avangin Vaphai khaw mi 6 velin hliam an tuar a, ngaihtuahawm lutuk erawh an awm lo a ni.

Saikhumphaia buaina chhuak avang hian DIG Northern Range Pu L.Shanliana pawhin Thawhṭanni zan khan Saikhumphaibawk hi a thleng nghal a, Thawhṭanni khan Champhai aṭangin LAD Field Inspector 4-in Vaphai khaw mipui thil tih chhiatte enfiah turin Saikhumphai bawk hi an lo pan tawh a, police ten venhimna khauh zawkin an kalpui bawk a ni.

He thil thleng avang hian District Magistrate chuan CRPC Sec 144 tlawhchhanin mi 5 aia tam punkhawm leh bungrua tihchhe zawnga chêt thawh a khap a, he thupek bawhchhia te chu dan anga hrem an nih tur thu a sawi a ni.

MZP chuan Vaphai khaw mipui ten mahni Mizo puite ngei chenna Saikhumphai Bawk an hâl chu hriatthiam harsa a ti tih nimin khan thuchhuah siamin a sawi a, khawvel hmun hrang hranga Zofate inkarah in unauna ṭha leh in pawhna ṭha zawk a awm theih nana hma lakna a awm mek laia tharum thawh zawnga chetna a thleng chu an dem tih an sawi a, Saikhumphai-a chêng te tan a rang thei ang ber a zirna in din leh nghal turin sawrkar an phut tih an sawi.

MZP chuan he pawikhawihna thleng chungchanga sawrkar hmalak dan chu a duh khawp lo hle tih a sawi bawk.