Mizoram Baptist Kohhran rorelna sang ber Assembly-in, “Mizoramah hlemhletna a tlem theih nan hmalak nise”, tia thu a rel bawhzuina’n kohhran mite hnenah thuchah a siam.
Baptist Kohhran thuchah-ah chuan Corruption chu ‘eirukna’a ni ber a, eiruk chu hlepruk, kuttling lova sum lakluh, hlemhletna, mahni hnaa rinawm lohna, mi chan tur laksak, mahni hna a rinawmlohna te, mi chan tur lak sak te, Kohhran leh sawrkar thil, mahni hlawkna atana dik lo taka hman te leh ‘Sum hman dan dik lova hmanral’, te hi a ni, an ti a. Thuneitute’n anmahni duhzawng leh hlawkna tura an thuneihna dik lo taka an hmang hi corruption a ni bawk, tih an tarlang a. Corruption awmtirtu-ah tluchhe tawh mihring pianpui thinlung duhamna aṭanga lo chhuak, Isua Krista neilotute leh Bible in tisa mi a tihte thiltih a nih thu an tarlang a. Hausak chakna te, dinhmun ṭha leh nuam taka awm chakna te hi corruption ti tura thlemtu an ni a; chutiang thil awhna leh tisa thiltih tenawm tak laka fihlim tur leh a ching thinte pawhin bansan turin mi zawng zawng an ngen a ni. Baptist Kohhran General Secretary Rev. H.Lianngaia leh Associate General Secretary Rev. Lalbiaksanga Chinzah te hminga thuchah siamah hian Corruption chu natna hrik anga mihring leh khawtlang eichhetu a ni an ti a. Cancer natna in mihring taksa leh thisen a eichhia ang tho hian corruption hian khawtlang nun (society) te, eizawnna (economics) te, ram rorelna (politics) te leh Kohhran thlengin a tichhe mek zel a ni. Hei hian hnam leh Kohhran mualphona leh chhiatna a thlen dawn. Ram leh hnam, Kohhran leh khawtlang hmelma lian berte zing ami ani tiin do tlat turin mipui an sawm a. Corruption hi Pathian huat zawng a nih avangin corruption titute chu Pathianin rapthlak takin an nun a khawih a, mualpho takin an tawp thin a ni tiin Kohhran mite chu Pathian anchhia leh a thinurna rapthlak tak pumpelh turin corruption laka inthiar fihlim tur leh dikna leh rinawmna kengkawh tlat turin an ngen a ni.