Zothlifim Logo
Loading ...

Health Minister Pu Lalrinliana Sailo chuan Health Minister’s Cancer Patients Fund aṭangin, cancer natna in a tlakbuak avanga inenkawl mek BPL chhungkua te hnenah ṭanpuina a sem.

Health Minister’s Cancer Patients Fund hi kum 2009 aṭang khan BPL Cancer natna tuartute hnenah pek ṭan a ni a, kum 2009 khan mi 131 hnenah cheng nuai 10 pek chhuah a ni a. Kum 2010 ah mi 190 hnenah cheng nuai 20 pek chhuah leh a ni a, kum 2011 ah cheng nuai 20 tho pek chhuah niin mi 157 ten an dawng a, kum 2012 khan vawi 2 pekchhuah niin mi 258 hnenah cheng nuai 40 pek chhuah leh a ni a, kuminah hian mi 217 hnenah cheng nuai 30 zet pekchhuah leh tawh a ni. Kum 2009 aṭanga tun thlengin mi 868 hnenah cheng nuai 120 pek chhuah tawh a ni.

Health Minister chuan Cancer natna hi engemaw chenah invên theih a ni a, heng pawisa te hi hlu viau mahse, damdawiin awm ngailo a, keimahni hriselna ṭheuh kan ngaihpawimawh a ṭul thu leh ei leh in ah pawh kan taksa tana ṭha tur chauh kan ei a ṭul thu sawiin, Cancer natna laka kan lo him zawk theih nan Zûk leh hmuan kan chin ṭhin te bânsan a ṭul thu sawiin, mitin te, tihdamna hlu viau mahse, inveng thei kan nih laiin keimahni hriselna theuh veng tha tur a a duh thu a sawi bawk.

Tun hnai ah 13th Finance Commission atangin IMR (Naupiang thi tlem) tihhniamna lama Mizoram-in hna a thawh ṭhat avangin incentive grant cheng nuai 3132 a dawn thu sawiin Infant Mortality Rate leh Maternal Mortality Rate tihniam tur hian kawng hrang hrangin theih tawpa ṭan lak a ni a, kum 2009 ah IMR 36, 2010-ah 37, 2011-ah 34-ah a tlahniama, kan population tlem ngaihtuah in mi pakhat thihna avang pawhin IMR hi a sâng nasa thei hle ṭhin a, thawktute thawhrimna leh in peknaah lawmthu sawiin tun aṭanga kum reilote ah tun ang zela kan kal a kan tan mar pat reng chuan India ramah pawh entawntlak leh Hriselna dinhmun a duhawm ber kan nih chhoh ngei a beisei tlat thu a sawi.