Mizoram News

Buaina chhuak vangin Lunglei-a TET Exam neih tur ṭhulh

Mizoram sawrkar buatsaih, Teacher Eligibility Test (TET) Exam Lunglei-a nimina neih tur chu buaina chhuak avangin exam theih a ni lo.

August 23, 2010 hnu lama SSA hnuaia Zirtirtu atana lak zawng zawng te Teacher Eligibility Test (TET) paltlang tura tih a nih tawh avangin nimin khan Lunglei Gov’t High School-ah SSA hnuaia zirtirtu thawk lai mekte tan TET Exam hi buatsaih a ni a, he Exam duhlotu DIET a Teachers Training nei mek ten an dodal avangin Exam hi kalpui theih a ni ta lo a ni.

DIET zirlaite hian kum 3 chhung zirtirtu ni tura training an neih laia SSA hnuaia zirtirtu a lak ten TET exam an paltlang avanga train teacher anga an awm nghal ringawt tur chu an hriatthiam loh thu leh DIET zirlaite hmuh-sitna nia an hriat thu sawiin he exam hi kalpui lo turin sawrkar an phut a, exam tura kal te hi exam Hall a lut theilo turin an dang a ni

Lungleiah chuan District Magistrate leh Police lam te inrawlhin exam hi kalpui turin hma an la a, DIET zirlaite nen hun engemawchen chu an in nawr buai a, hemi avang hian DIET zirlai mipa pa 5 te chu Police te hian manin, hmeichhe 2 in hliam an tuar bawk. Zirlai hmeichhe pahnih hliam tuarte hi Civil Hospital, Lunglei panpui nghal niin, a ṭul anga enkawlna pek an nih hnuah pakhat chu admit loin chhuah tir leh nghal a ni a, pakhat Admit a ni. Zirlai ṭhenkhat police in an lak te pawh boruak daih hnuah chhuah tir leh nghal an ni bawk.

Hetianga DIET zirlaiten Aizawl leh Lungleia TET exam tur an dan chungchangah hian SSA Employees Association, Mizoram (SEAM) te chuan thuchhuah siamin DIET trainees ten SSA teacher test turte an dang leh SSA Teacher 716 thawk mekte hna chungchangah an inrawlh vak mak an tih thu leh pawi an tih thu an sawi a. SSA Teacher August ni 23, 2010 hnu lama appoint te hi lak an nih laia qualified, tlinga pawma lakte an ni a, lak an nih lai hian RR in TET a phut lo bawk a. Kum 3 dawn an thawh hnuah kumin 2013 PAB in TET an neih a phut thar ta thut mai a, TET a through loh chuan hlawh pek tawhlohah a vau bawk a. Hetiang anih avang hian TET nei Mizoramah an la awm silo, Central-in nei turin an phut si, thla thum chhunga TET exam buatsaih phalsak turin Central-ah ngen a ni a. NCTE norms ang chuan tuna exam beih ngeite hi a tam zawk trained loh an nih avangin an tlinglo ngei a, mahse hna lak an nih laia sawrkarin tlinga a pawm, service lai mek an nih avang leh hetianga thil alo awm takah an hna hial chan thei dinhmuna an awm tak avangin sorkar chuan hrethiamnin Special TET a buatsaih sak ta ani a. TET buatsaih chhan hi regular a in appoint-na tur ani lo a, TET an paltlang chuan SSA ah an thawk chhunzawm thei chauh mai zawk a ni tiin heng thawktu mi 716, nupui fanau chawmtute eiawnna tawp mai turah hian PSTE Trainees Union te hian mawh an phur ngam tak zet angem tih an zawt a ni.

Nimin tlai khan Education Minister Lalsawta office-ah hemi chungchang ngaihtuah hian Eduication hotute an ṭhukhawm nghal a. MTET test hi an vai atan Aizawl-ah June 22 (Inrinni) chawhma dar 10:30 khian neih leh tura rel a ni.

SSA Project Director Lalhmachhuana chuan RTE April 2010 in a tih angin, MTET hi neih ngei a ngai a, he test hi Mizoram-ah a vawikhatna atan neih tur a ni a, pre-service te tan post ruak a awm loh avangin, DIET Aizawl & Lunglei Trainees’ Union te thil phut hi tih hlawhtling theih a la ni rih lo niin, a sawi bawk.

Hetihlai vek hian DIET Aizawl & Lunglei Trainees’ Union chuan nimina sorkarin exam an buatsaih exam tura kal ten an boycott chu a hlawhtling tiin, sawrkarin exam- conduct leh pawha, an thil phutte tihhlawhtling anih hma chuan exam rih lo turin ngenna an siam a. Guidelines an phutte sawrkarin a tihhlawhtlin sak hma chuan theihtawpin an beih zel tur thu Mizo mipuitten lo hriatpui turin an ngen nghal bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram