Mizoram Finance Commission-in kum 5 lo awm tur chhunga state sawrkarin sum a sem dan tur ruahmante leh tualchhung sawrkarte hnena mawhphurhna pek belh tur rawtna a siam tur chungchang-ah nimin khan inrawnkhawmna Aijal Club-ah a buatsaih.
Finance Commission Chair-man Pu Vanhela Pachuau kaihhruai he inrawnkhawmna-ah hian political party hrang hrang aiawh te, University aṭanga mithiam thlan chhuah te, sawrkar-a hna sang leh pawimawh chelh tawh te, Autonomous District council leh Aizawl Municipal Council aiawh te, NGO aiawhte leh mithiam dangte an tel a ni.
Mizoram Finance Commission hian a hnathawhna tur atan data tam tak a mamawh a, chung data lakkhawm dan tur kalphung chi hrang hrang duang chhuakin, Mizoram sawrkar aṭang te, Aizawl Municipal Council aṭang te leh Autonomous District Council pathumte aṭangin data a dil khawm mek a, Mizorama Village Council 757 leh Aizawl Municipal Council hnuaia Local Council 83 te hmasawnna lama an dinhmun hriat nan survey a nei mek a ni.