Green Mizoram Day hmang

Nimin khan Mizoram pumah ‘Green Mizoram Day’ vawi 15-na hman a ni a, a hawnna inkhawm chu nimin zing dar 7:30 khan ICFAI University Campus, Durtlang ‘N’ah neih a ni.

Kumin thupui atan ‘Thing phun la, I ram chhan rawh’ tih hman a ni a, Green Mizoram Day hawnnaah Home Minister Pu R.Lalzirliana leh Environment & Forests Minister Pu H.Rohluna te an tel a ni.

Home Minister chuan, Mizoramah Ramngaw a chereu nasat avanga boruak danglam chuan a bik takin Aizawl leh a chhehvel chu phairam ang maiin a ti lum tawh a ni a ti a, Mizoram chu thlaler ramro leh tui hna vanna hmunah chantir mai hlauhthawn thu a sawi.

Home Minister hian Forest Ranger Pu M. Malsawma lehkhabu ziah ‘Book of Mizoram Plants’ tih chu a tlangzarh nghal a. He lehkhabu ah hian Mizorama thing leh mau chi hrang hrang, ramsa leh sava te leh nungcha dangte hming bakah an chanchin leh thlalak thahnem tak a awm a ni.

Environment & Forests Minister Pu H. Rohluna pawhin thusawiin, Green Mizoram Day hman thin hian mipuite chu Environment humhalh kawngah ti thangharh thei se a ti a, Green Mizoram Day programme-in a tum ber chu – Mipui te hnenah ramngaw leh a pawimawhna hrilhhriata, chhehvel, a bik takin tlangram atana ramngaw tangkaina zir leh pawimawh zia hrilhhriat te; thilsiam zawng zawngte chenna inbuk tawk (ecological balance) nei tura ramsa leh thing leh mau awmsa vawnhim leh humhalh te leh tui thianghlim in tur hnianghnar kan neih theihna tura tuihna tihpun te a ni, a ti.

January 2009-a Satellite thlalaka landan atang chuan Mizoram pumpuiah ramngaw sq km 19,117 a awm anga chhut a ni a; Mizorama ramngaw pum-puia carbon stock chu tonne 97,09,28,000 anga chhut a ni a, chu chu hectare khat a tone 52.41 a ni.

Green Mizoram Day hi dist dang- Lunglei, Champhai, Serchhip, Kolasib, Mamit, Lawngtlai leh Saihaah te pawh uar taka hman a ni a, thing tiak engemawzat, sorkar hnathawk leh school naupangten an phun.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram