Serchhip News

Kawngpui ṭha dimdawi taka hmang a humhalh turin mipui ngen

Nimin khan Sub-Hqrs. YMA Serchhip Vigilance & Monitoring Committee chuan thuchhuah siamin Serchhip mipuite chu kawngpui ṭha kan neih te dimdawi taka hmang a, humhalh turin an ngen.

An thuchhuah chuan hunrei tak kawngchhia vanga Serchhip mipuiin hrehawm kan tawrh hnuah kan sawrkar duhsakna avangin Serchhip khawchhung kawngpui National Highway 54 leh PWD enkawl veng leh veng inkalpawhna kawng ṭhenkhat chu sum tam tak senga siamṭhat a lo ni ta a, kawngpui ṭha min siamsaktu Mizoram sawrkar, a bik takin Serchhip Bialtu MLA leh Chief Minister ni bawk Pu Lal Thanhawla chungah Sub-Hqrs. YMA Serchhip Vigilance & Monitoring Committee chuan lawmthu an sawi a, Serchhip khua-in kawngpui ṭha kan neih te dimdawi taka enkawl a, vawnhim chu Serchhip mipui ten kan tihtur a ni tih sawiin, kawngpui tichhe thei thil Kawngpui a Rod chhut ngil te, Kawngpui a tuichhe paih, Motor sil, insuk etc. te, Kawngpui a thing, Lung leh Gas bur dim lo taka thlak/Unload te chu mi tumahin ti lo turin an ngen a ni.

Nimin vek khan Sub-Hqrs. YMA Serchhip Vigilance & Monitoring Committee hian Serchhip Town huamchhunga National Highway 54 in a paltlang Branch YMA te hnenah lehkha thawnin an huamchhung ṭheuhva kawngpui awm te humhalh kawnga hma la turin a ngen nghal a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram